Inkhàrkhipah Sorkar i ṭawiawm ang u
Chief minister Zoramthanga hoa sorkar hotute leh pawl hrang hrang aiawh ṭhukhawm chuan, July 1, 2020 aṭangin ném deuh zawka inkhàrkhip an rél a; inkharkhip kal zel dan tura inkaihhruaina pawh sorkarin a tichhuak ta.
Mizoram hi state dang tam tak aia inkharkhip ṭan hmasa kan ni a, state tam takin inkharkhip an tihtawp hnuah pawh kan la inkharkhip chhunzawm zel dawn a ni. Hei hi Covid-19 laka Mizoram a him zelna tura ruahmanna pawimawh tak a ni a, sorkar thu kan zawm ṭhat a, sorkar lamin an tih tur an tih zat zat chuan he hripui hlauhawm tak lakah hian buai lutuk loin kan awm thei dawn niin a lang.
India ramah chuan Mizoram hi Covid-19 laka inveng ṭha ber pawl kan ni ngei ang. Sorkarin theihtawp a chhuah a, mipui lamin ṭha takin an thlawp bawk a, kan thawhhona avangin he hripui lakah hian thui tak chu kan him niin a lang a, a lawmawm takzet a ni. Tunah hian sorkarin midangte nena an inbiak rawn hnuah tlema dul deuh zawka inkaihhruai a tum ta a, hei hi mipui nawlpui hian zalenna dar vaw taah an ngai mai ang tih a hlauhawm a, uar zawka zirtirna kalpui zel chu a ṭha awm e.
Sorkar hian loh theih lohna avangin inkharkhip hi a thlahdul hret chauh a ni a, eizawnna tam tak chawl rei lutuk hi kalpui a ṭul tawh a, chhungkaw tam tak an buai tawh em avangin inhawn zau ve deuh hi a hun tawh reng a ni. Hetihlai hian Covid-19 lakah kan la fihlim lo tih erawh kan in hrilh zel a ngai a, kan state ṭhenawmah nitin a la pung zel a, India ram pumpui thlir pawhin he hri hi nasa takin a la darh mek zel a ni.
Hei vang tak hian kan sorkarin inkharkhip a la kalpui zel pawh hi kan state tana ṭha tur an ngaihtuah vang a ni a, mipui nawlpui chhuak tur khap beh leh sumdawnna khar hrim hrim kha sorkar tan pawh thil ṭha a ni lo a; nimahsela loh theih lohna vangin a kalpui mai a ni. Tunah hian a inhawng zau ta deuh a, hei hi kan him ta tihna a la ni chuang lo a, loh theih lohna vang bawka inhawng zau a ni tih mipuiin kan hriat a ṭha awm e.
Sorkarin kan zavaia tana ṭha ber tur ngaihtuahin inkharkhip dan thar a duang leh a, hei hi kan zavaiin zawm tlang ila, sorkar hi ṭha takin i ṭawiawm ang u.