Hnathawk ṭha lo hrem leh hrem loh

Ṭamdil enkawltu K Lalrohlua, Boatman (IV Grade) chu tun hnai khan Mizoram sorkarin a hna aṭangin a ban. An ban chhan hi khualzin pakhat Nilanjan (@neilanjanB) chuan Ṭamdil a tlawh thu leh, tourist lodge hmunhma leh a chhung a ṭawp thu te, bungrua a chhiat thute leh a enkawltu a ruih thu social media pakhat Twitter-ah a tarlan vang niin a lang.

Tourism Depart­ment-in heti teh thuta an hnuaia hnathawk (provisional emplo­yee) an ban chhan nia lang hi social media lama thu post vang a ni. Hetihlai hian Twitter-ah vek hian Govind Saria (@govind_saria) chuan September 26-ah hian Ṭamdil hi a tlawh ve tho thu leh tourist lodge-ah hian a nupui nen an riah thu a sawi a, a enkawltu hi a rui lo tih a tarlang ve thung.

Hnam dang khualzin thu post avanga Mizo pa eizawnna tihtawp a ni teh thut hi thil mak tak a ni. Social media-a thu ziak kan ring dawn a nih chuan, "A rui lo," tia thu ziaktu an awm ve bawk avangin zir chiang hmasa loa thil kapui hi a fel lo hle.

He mi rual chiaha Boatman ban tak tun hmaa department lamin an lo khak tawhna lehkha a darh nghal hian Tourism department-in thiam chan duh avanga an tihdarh luihah a puh loh theih loh a, kum 2008 leh kum 2016-a sorkar lehkha a darh thar thut hi sorkar inrelbawlna fel lo tak lantirtu a ni.

Hnathawh ṭhat loh avangin Lengpui Airport a chim tawh a, khawvel hmuhah Mizo leh Mizoram a mualpho a, hna thawktu Kamrul Laskar chu ban a ni lo; hemi hnu hian Class I contractor-ah a la kaisang hial a ni. Assam Rifles hotupa lo zin chuan Mizoram kawngpui chhiat thu Larsap hnenah a thlen a, kawngpui viltute tumah khak leh hrem an ni lo a; kawngpui siamna tur sum a nuai za tela eirua inpuhna pawh umzui loh a nihlaia Twitter-a thu post pakhat avanga chhungkaw pakhat eizawnna tihtawp a ni hi chu a fel lo a, chhui chian hma­sak ni se a ṭha ngawt mai.

Sorkar hian hnathawk ṭha lo a ban ngam a nih chuan dem ngawt tur a ni lo a, huaisen takin ke pen zel rawh se. Chutihlaiin ṭul leh pawimawhte zir chiang hmasa se, ban ngam loh leh hrem ngam loh nei lo bawk se - social media-a tute emaw thu post mai maiah sorkar hi innghat tawh lo bawk se.