Sorkarin ngaihtuah nawn thei se

Tun hnaia Mizoram sorkarin Ṭamdil enkawltu Boatman (IV Grade) a chawlhtir chung­changin media hrang hrang­ah sawi a hlawh hle mai a. September 26-ah Ṭamdil enkawltu chanchin hi a mawi lo zawngin hnam dang pakhatin Twitter-ah a tarlang a, September 28-ah banna lehkha tihchhuah a ni zui ta a ni.

Sorkar lam hian an ban chhan an tarlanah hian zu rui chungah hna a thawh vang te, sorkarin tih tura a tih leh mawhphurhna a pek ang a tih loh thu te, a duty-na hmun­hma a enkawl ṭhat loh avang te, vawi tam tak insiam ṭha tura tih a nih hnuah a insiam ṭhat loh avanga sorkar leh Department a tihmualpho avangin an ban tih an ziak a ni.

Sorkar lam hian ban chhan tling thil an hmuh avangin an ban ta a ni a, hetihlai hian a ban dan kalphung hi chu ennawn leh thei se a ṭha hle. Hnathawk ṭha lo leh fel lote hi chhan tur an ni lo a, chutih rualin tute emaw thu ziak leh thu thehdarh avang maia hrem a nih a, uluk taka chhui chianna an kalpui lo a nih chuan a fel lo ang.

Department dang kal­phungah leh he sorkar hnuaiah ngei pawh hian inhekna chu a lo awm tawh ṭhin a, hotute hriat tura thil dik lo hrilhte pawh a awm tawh ṭhin ang. Hetiang thilah hian puitling tak leh kawng hmang fel tak neiin sorkar hi a chet ṭhin a ngai a, vawi leh khata thutlukna siam thut hi a fuh ber lo thei.

Engpawhnise sorkar hian tuna a thutlukna siam tawh hi ennawn leh thei se, fiah takin chhui chiang hmasa se. Chhui chian a nih hnuah sorkarin ban chhan tlinga a ngai a nih chuan a la ban leh thei a, chhuichianna awm loa hetianga sorkar ber a che thut mai hi mipuiin an pawm thei lo niin a lang.