Hri donaah tihfuh kim a harsa
Tun hnaia Mizorama sawi hlawh ber pakhat chu Covid-19 hrik endikna khawl RT-PCR chungchang a ni. Congress MLA pakhatin Lunglei Civil Hospital-a hman atana he khawl a pek hi sorkar lamin lawm taka dawn harsa an ti a, Lunglei-ah mai ni loin ram pumah sawi zui a hlawh hle.
Sorkar lam chuan RT-PCR chu khawl man to leh a laboratory mamawh pawh siam mai harsa tak a nih thu an sawi a, chief minister hmalaknain district tinah a endikna khawl man tlawm zawk Truenat khawl ruahman a nih thu an sawi bakah, RT-PCR ngei pawh hi USA aṭanga an chah chu a lo thleng ṭep tawh niin an sawi.
Hri len tirha thuneitute an inhmuhkhawmna hmasa lamah pawh RT-PCR lei rawtna hi a lut daih tawh a, chuti chung chuan sorkar hian a lei lawk lo a, tun thlengin ama pualin a la chah thleng lo niin a lang. Hei mai hi ni loin RT-PCR din mai harsatzia uar taka sawiin an thehdarh bawk a; nimahsela a thiamte'n a khawl bun theih dan an ngaihtuah hnuah hun rei vak lo chhungin chu khawl bawk chu an bun leh thei ta mai a ni.
Covid-19 endikna chi dang, a man tlawm zawk leh a rintlak lo zawk RAT hman an rawt a, RAT-in a hmuh hmaih hri vei a hlawma hmuh chhuah a nih tak hnuah chawpchilh takin a man to leh rintlak zawk RT-PCR sawi rik a ni chho a. State pawn aṭanga a hlawma lo haw an tam vanglai a ni bawk nen, sorkar a buai ta a, thawktute pawh an hah hle a ni.
Buai zualpui a reh hnai a, a boruak a reh ṭan dawn tihah sorkarin mimal hnen aṭanga RT-PCR khawl leina lawm taka a dawn hnu lawkah eptu MLA pek RT-PCR chu lawm taka dawn harsa a ti leh lawi si a; hei hian chhim mipuite rilru a hliam deuh niin a lang. Khawl inang reng si, pakhat lawm taka dawnga pakhat lawm taka dawn harsa a ti hi ram pum enkawl tura thlan chhuah sorkar tihah chuan a inhmeh lo hle.
Covid-19 endikna atana sorkarin tun hnaia a sawi mawi tak chu a tir lama a sawi rik vak loh, a man tlawm zawk leh enkawl awlsam zawk Truenat khawl a ni.
Engpawhnise kan do hi a hautak em em a, sum a heh a, hun a heh a, tha leh thluak tam tak sen a ngai. Sorkar tan thil zawng zawng tihfuh kim a harsa a, tihfuh tawk loh pawh a nei tih kan hun tawn mek niin a lang.