Faina leh Mizoram

India hnam pa Mahatma Gandhi pianchampha denchhenin October chawlhkar hmasa ber hi Faina Hapta atan hman ṭhin a ni.

Mizoramah he faina hunpui hi ṭangkai taka hman a lo ni tawh ṭhin a, kuminah pawh hman mek a ni. Fai hi inzirtir theih a nihzia chu Mizoramah ngei hian a takin kan hmu tawh a, fai nachang hre lo pawhin a awm reng theih tih kan hmu mek bawk. Mizo khaw pangngai ve tho, thil danga danglamna nei bik lote pawh hian fai an uar lui tlat a, fai inzirtirna chak takin an kalpui a, chu chuan rah ṭha chhuahin an khuaah bawlhhlawh hmuh tur awm mang lo khawpin an fai thei.

Hemi lehlamah chiah hian Mizo khaw pangngai ni ve si bawlhhlawh paih inthlahdah em em, kawngpui leh hmun pawimawh laite pawh ṭawp taka hnutchhiah reng thei veng leh khua an awm ve bawk. An danglamna chu 'ngaihtuahna' lamah a ni a, Mizo khua ve ve, sorkar thuhmun hnuaia awm si a infai hleih theih dan aṭanga lang chiang chu fai hi inzir theih leh sawt tak a ni.

'Faina Hapta chauh ni loin fai kumte hi hman ni zawk se,' tia an rawt fiam angin Mizorama khua leh veng ṭhenkhat hi chu kum tluanin an fai a. Fai an nunpui miau avangin naupangte pawh a tibawlhhlawhtuah an ṭang lo mai ni loiin a tifaitu ṭangkaiah an zirtir chhuak thei zel a ni. Fai hi nunphungah a neih theih a, Mizorama khua leh veng ṭhenkhat chuan an nunpui mek a, an entawntlak takzet bawk a ni.