Sorkar laipui ṭanpuina

BJP, Mizoram Pradesh president chuan tun hnai thuthar thehdarhtute a kâwm a; prime minister Na­rendra Modi vangin Mizoramin ei leh barah harsatna a tawk lo niin a sawi; Pradhan Mantri Garaib Kalyan Yojna (PMGKY)  avangin Mizoramah pawh tun thlengin mi harsa zawkte'n ration an la thei a, a thlâwnin mi pakhat zelah buhfai kg. 5 thla tin pek ṭhin a nih bakah dâl/ chana kg. khat a thlawna an dâwn thu a sawi. 

State sorkara roreltu an inthlak ṭhin ang bawkin sorkar laipuiah pawh roreltu an inthlak ṭhin a, India ram bung khat kan nih angin India sorkarin a mipuite tana hamṭhatna a siamte pawh kan dawng ṭhin. Heng thilte hi mirethei leh harsa zawkte hian kum tam tak chhung an lo ṭangkaipui tawh ṭhin a, tun hnaia Covid-19 hri lenlaia ruahmanna an siamte pawh hi a ṭangkai takzet a ni. 

Hei mai hi a ni lo a, a nihna takah chuan a state pumpui hi sorkar laipuia innghat kan ni a, anni puihna chu awm lo se hripui len loh lai pawha ṭam thei dinhmuna ding kan ni. Tu pawhin sorkarna vawn fung chelh se, anni puihna avanga kal ve hram hram kan la ni ber a, mipui nuai 11 vêl lek hi kan state sorkar hian intodelhin min la siam thei lo chu a ni ber mai. 

Hetihlai hian Mi­zoramah hian sorkar laipui aṭanga ṭanpui­na lo kal hi state sorkara roreltu party lam hian anmahni tih anga kalpui an ching a, a zialo hle. Mipui nawlpui huap ni lo, thlan bikte tana hamṭhatna awm tur chi-ah phei chuan party invulhna atana hman mai chingte an awm ṭhin hi a vanduaithlak takzet a ni. 

Buh leh bal ṭhat duhna rama cheng niin kan insawi ṭhin a, ruah tui ni se kan dawng ṭha em em a; chuti chunga sorkar laipui puihna tel loa ṭam thei dinhmuna a state puma kan la ding reng mai hi chu kan ram roreltute hian a zahthlak tih nachang hria se a ṭha khawp mai.