Hmai hnih nei sorkar?

Mizoram Pradesh Congress Committee chuan tun hnai khan thuthar thehdarhtute kawmin Mizoram sorkarin Sorkar hna­thawkte hlawh bat a nih laiin ruling party mite tan contract cheng vaibelchhhe tam tak pek chhuah a nih thu an sawi a. RTI Act chhanna aṭanga a lan danin, inkhàrkhip lai, May aṭanga June 23 thleng khan Mizoram State Sports Council (MSSC) hnuaiah ringawt pawh cheng nuai 825 man pek chhuah a ni, an a ti a;  heng contract hnate hi hna hmanhmawhthlak a ni lo vek tih an sawi.

Mizoram sum din­hmun hriat duhin mi­puiin an ngaihven a, kan Finance minister chuan a figure zawng­in a sawi lo a, sum hmuhna tur hriat a nih loh avangin Pathian chauh lo chuan kan sum dinhmun a hriat loh thu a lo sawi tawh. Finance minister bawk hian kan sum dinhmun a ṭhat loh thu a sawi leh a, sorkar hnathawkte hlawh pûk/ bat hial ngai khawpin sorkarin sum a nei ta lo. 

Hetihlai hian CM Relief Fund lamah mi tlawmngaiten sum an thehlut reng a, a hmanna tur tam hle mah se a lut lam a ṭhahnem avangin hman bâng pawh a ṭha­hnem tham hle. Hei bakah hian sorkar laipui aṭanga sum lo lut tur angte chu a lut mêk reng a, Mizoram sum dinhmun hi a ṭha nge ṭha lo tih erawh chu hriatthiam harsa takin a awm mek. 

Kan sum dinhmun chhiatzia tilangtu chu mahni hnathawkte hlawh bat ṭhen ngai khawpa sorkar a awm ta hi a ni a; nimah­sela inkharkhip vanglai leh sum pûk a ṭul lai pawha cheng nuai 800 chuang man hna hmanhmawhthlak pawh ni lo thawhna tur sum a la nei lawi si hi a ni.

A ruh langa sawi dâwn chuan kan sorkar hian SEDP lama a sum dah hi a la hum tlat a, heng pawisa hmang heu loa hri do hi a tum a ang lek lek mai; hri dona atan mipui pawisa a dawng khawm ruih ruih a, sorkar hnathawkten a hlawmin an thawh khawm bawk a, chumi piah lamah sorkar hnathawkte hlawh a la ba ṭhen hial bawk a ni. 

Sorkar hian sum a nei lo tak tak a nih chuan a loa awm theih hnathawh tur ṭhenkhatah hian lo insum ve deuh se, chhungkaw tam tak chhuanchham lek leka an talbuai a, hnathawh tur nei lo an pun mêk lai leh amah sorkar ngei pawhin a hnathawkte hlawh a batsak lai em em hi chuan party induhsakna hna sem hi chu insum ve teh se.