Ramri buaina chinfel dan a lawmawm

Tun hnaiah Zophaiah Assam sorkar mi leh sate chuan kut rawn thlakin chawlhbuk an rawn sa leh a, hei hi sorkar thuneitute inbiak hnuah Assam lam bawk hian an ṭhiat leh ta a ni.

Sorkar thuchhuah tarlan danin Zophaiah boruak ṭha lo a chhuak palh thei tih hriain state pahnih Chief Minister leh Home Minister-te biak pawh an ni a, he mi hnu lawk hian Assam lamin an chawlhbuk sakte an ṭhiat zui ta a ni.

Bialtu MLA hoin sorkar mi pawimawh leh khawtlang hruai­tute an inhmu khawm zui a, an thusawi zingah, "Pawl hrang hrang kal fawr bik awm lova in­lungrual taka sawrkar thu ngaichang chunga thawhho a pawimawh thu te, Police duty dah belh a ṭul thu te sawi a ni," tih hi a pawimawh takzet a ni.

Ramri buaina a awm hian tute emaw hi neitu bik riaua inhria an awm ṭhin a, ram an humhalhna kawngah chuan an chhuanawmin an thawk ṭha ṭhin a, nimahsela a thawm ring tak neia reh zui leh mai an ni fo. Ramri chhehvela awmte'n rei lo te atana boruak rawn siam a, a ramri buai chingfel tak tak si loa haw leh mai ṭhinte'n a hmuna chengte tana harsatna an thlen thu hi an lo sawi tawh ṭhin reng a ni.

Keini chuan ramri pawm chin nghet kan nei a, a taka kan luah ngam chin erawh a rawn thûk hle thung a, Chief Minister-te meuh pawh inbe tawh mah se ramri hi awlsam taka chinfel theih a ni dawn lo.

Engpawhnise tunah hian Mizoram leh Assam ramri hi a la fel lo a, harsatna awm thei leh buaina chhuak thei erawh thiam taka pumpelh a ni a, a lawmawm hle a ni.