Kawng pawimawh chhe ṭhin hi

Mizoram Truck Owners' Association leh Mizoram Truck Drivers' Association hruaitute tun hnaia ṭhukhawm chuan, Bairabi railhead leh FCI kudam inkar kawngpui chu a chhiat avangin lirthei leh a khalhtute tan a him loin an hria a, siam ṭhat a nih loh chuan July 6 aṭangin buhfai phurh chawlhsan an rel.

Mizoramah hian fur ruahtui a tla nasa a, kan ram leilung a nghet tawk lo nen, furpui a lo thlen hi chuan kawng chhia leh lirtheia zawh ngam loh hi chu a awm kum tin ṭhin a, thil thar a ni lo. Nimahsela heng kawng zawh ngam loh zinga kawngpui pawimawh a tel ṭhin hi a pawi takzet a, tuna kawng chhe mek pawh hi siam ṭhat thuai ni thei se a ṭha khawp mai. 

Tunah hian Mizoram châk lâkna ber kawng pawimawh, Kawnpui leh Sairang inkar kawng chu lirtheia zawh hlauhawm khawpin hmun eng emaw zatah a chhe leh tawh a, lirthei ṭhenkhat chuan an zawh ngam tawh lo a ni. Kan ram leilung leh ruahtui tlak danin a zir miau si lo a, sorkarna a inthlaka beiseina sang tak nena kan lo thlir pawhin kan kawngpui pawimawh takngial pawh a ṭha kumtluan thei lo hi chu a pawi ngawt mai. 

Tuna Bairabi-a kawngpui chhe zual lai hi chu state sorkar chan a ni chiah lo niin an sawi a, engpawhnise zawh ngam loh khawpa chhiaa a awm hma ngei hian sorkar thuneitu lam pawhin tlawhin en zui thei ṭhin se, hetiang em hi kan thleng lo tur. 

Kan ram hruaitu lam pawhin kawngpui pawimawh bik hi a chhiat ṭan tirh deuh aṭangin a thawm ṭhat dan ngaihtuah thei se, siam ṭhat a ṭul fe tawh hnua an chet chhuah chauh hi chuan a lo tlai zo tawh ṭhin. Kawngpui zawng zawng siam ṭhat rual a ni lo a, kawng pawimawh bik erawh vil uluk zual ni ṭhin se, a ṭul a nih chuan sum pawh dah ṭhahnem bikin kum tluana tluang taka lirthei a kal tlang theihna tur tawk tala vil theih ni hram rawh se.