Fimkhur a la ṭul zel

Tun hnaiah state pawn aṭanga rawn haw mi pahnihte chu an khúa an panna kawngah Thenzawlah thingpui dawrah an chawl a, anni pahnih hi a hnuah an positive a ni tih hmuh chhuah a nih leh tâk avangin Thenzawl khuaah total lockdown puan a ni. 

Covid-19 avangin ni 100 zet Mizoram a inkharkhip tawh a, he hri hlauhawm hi kan ramah a lo lut tawh tih hre reng mah ila ei leh bar zawn a ṭul avangin sorkar pawhin zawi zawiin inkharkhip hi a thlah dul a ṭul ta a, sumdawnna dawrte pawh an inhawng leh ṭan ta. 

Hetianga kan awm tâk avang hian kan ram hi Covid-19 lakah a fihlimin a ralmuang ta a ni hauh lo a, tunah hian vantlanga inkai darh huk thei dinhmunah kan ding leh ta hial zawk a ni. State pawn aṭangin an lo haw belh zel a, Covid-19 positive thar hmuh chhuah an la ni chhunzawm zel. 

Lo haw thar zingah sorkar dan zawm loa mahni duh anga awm an awm avangin tunah Thenzawl khúa chu a inkharkhip a ṭul ta hial a, a pawi hle a ni. Lo haw thar zinga dan zawm lote an demawm rualin zalen taka two wheeler-a kal theia an siam hi a dik lo hulhual a, Covid-19 dona kawngah hian kan ṭan rual a ṭul takzet a ni. 

Kan ram dinhmun en hian Covid-19 kan dona kawng­ah inthlahdah a thiang lo a, fimkhur chhunzawm tura infuih thar hunlai tak a ni e.