Kawngpui chhia leh sorkar

Hachhek Constituency Development Committee (HCDC) chuan Tuidam-Darlak inkar kawngpui chhia chu a rang lama siam ṭha turin sorkar an ngen a, mipuiin hnatlanga vawi tam an siam hnuah pawh siam ṭhat a la ni lo chu pawi an tih thu an chhuah. HCDC chuan Bairabi-Zamuang kawng chu siamna a la rei lo chungin tunah a chhe leh tawh hle tih sawiin an tana kawngpui pawimawh a nih avanga chei ṭha turin sorkar an ngen bawk.

Fur ruahtui tlak tam kum a ni a, kawng­puiin a tuar deuh hi a mak hran lo a, hei hi tun hma pawha thleng tawh ṭhin a ni. Hetihlai hian Mizoram khaw thlang lam kawngpui pawimawhte hi kumin fura chhe thar thut a ni lo a, sorkar lamin a ngaihsak tawk lo niin a lang a, a rang lama siam ṭhat theih ni se a lawmawm hle ang.

Fur ruahtui tlak avanga kawng­pui chhia a awm theih lai hian a siam dan ṭha lo avanga kawngpui chhe hma leh siam fuh loh hrim hrim pawh a awm thei a. Tuna HCDC sawi chhuah Bairabi-Zamuang kawngpuite hi siam zawhna la rei si lo a chhe leh hma lutuk hi chu a pawi hle a ni.

Mizoram chhim lama Siasi-Chakhei kawngpuite pawh a siam dan a ṭhat loh avangin BJP Mizoram chu Ministry of Road Transport and Highway lamah an lo zualko hial tawh a, a chang­tu Minister pawh lo kal a tum niin an sawi nghe nghe. Tun hnaia Mi­zo­ram tlawhtu Inspec­tor General Assam Rifles (East) chuan Mizoramah kawngpui a chhiat avanga inkal pawh a harsat thute Larsap hnenah pawh a lo thlen tawh.

Kan ram leilung, kan sik leh sain a zir loh avangin state dangte anga kawngpui tlo tak kan nei thei lo a nih pawhin state dangte anga uluk taka siam erawh thil theih a ni a, kan kawngpui siam dan hi ennawn ila, sorkarin ṭan han la thar teh se.