AR sawn chhuah politics

Peoples' Conference party chuan Mizorama sorkarna siam tawh MNF leh Congress-te chu an intiam anga Assam Rifles-te Aizawl khawpui laili aṭanga sawn chhuak thei loah a puh a, "Tun thlenga AR-te sawn chhuak thei lo sorkar kan la hrawn fo hi a thanatthlak kan ti tawh takzet," an ti a; MNF leh Congress chu kum 35 an in sorkar chhawk chhunga AR sawn chhuah tumna tak tak nei loah an puh a ni.

Aizawl khawpui lailia awm mek Assam Rifles-te hi Aizawl khawpui daia Zokhawsang hmuna insawn chhuak tura tih an ni a, an insawn chhuahna tur hmunah hian an chenna in turte sorkar laipuiin a sa peih vek tawh a, state sorkar lamin an pek ve tur tui leh êng pawh an pe fel tawh. Kawngpui pawh siam ni tawhin insawn chhuak tawh mai tura ngaih an ni.

Tun hnaia New Delhi-a zin chhuak Chief Minister phei chuan Zokhawsang hmuna AR-te awmna tur hawng tur hian Union Home Minister a be fel vek tawh a, Home Minister hi a phur hle nghe nghe nia a sawi bakah an chenna hmun tur ber hawn fel a nih chuan Lammual hmun aṭang hian an insawn chhuak tura an ngaih thu CM hian a sawi a ni.

AR sawn chhuah leh sawn chhuah loh hi state sorkar thu­neihna piah lam a niin Ministry of Home Affairs phalna lo chuan tih theih a ni lo a, hei vang hian tualchhung politics nen hian sawi pawlh loh a ṭha hle. Hetihlai hian sorkarna chelhtu apiang hian politics-ah bawk kai lutin sawn chhuah an tum thu mipuiah an puang ve chamchi bawk a, hei hi thil tih loh atana ṭha a ni.

Assam Rifles-te insawn chhuah loh avang hian state sorkar demna tur a awmin a lang lo a, chutiang bawkin an lo insawn chhuak ta a nih pawhin state sorkar fakna tur an awm chuang lo ang - MHA thu a ni e.