Fimkhur taka raltlan ngaihven a hun

Mizoram Governor leh Australian senator Dean Smith chu tun hnai khan Raj Bhavan-ah an inkâwm a, Mizoram dinhmun leh hmalaknate leh Myanmar ráltlânte chungchang an sawi dun. Senator chuan, Mizoram a tlawh chhan pakhat chu Myanmar ráltlân-te chungchang a nih thu sawiin, Mizoram sorkarin raltlante a ngaihsak dan leh hma a lak dante a zawt.

Myanmar ramah tualchhung buaina a awm avangin sahim­na zawngin mi tam tak Mizoramah an rawn tlanchhia a, heng mi mangangte hi kan unaute an nih bawk avangin ṭha taka lo dawnsawn hi kan tih ngei tur a ni.

Chenna bakah ei leh in tur lo pek te, thawmhnaw leh silhfen lama lo puih hi a Mizoin a Kristian hle a ni. India sorkar hian politics thil avangin raltlante hi a lo dawngsawng ṭha duh lo a nih pawhin Mizote chuan kan hnar ve thiang lo a, state sorkar, tlawmngai pawl, khawtlang leh kohhran thlengin kan lo dawngsawng ṭha hle a ni.

Hetihlai hian thil hi a nihna tak kan ngaihtuah chian ngam a ṭul a, hmingchhiat leh dem hlauh avang ringawta thil nihna sawi chian ngam loh hi a fel lo. DC hrang hrangin thuchhuah an siam ngai khawpin raltlan zingah document siama India khúa leh tui nih tum te, sumdawnna bul lo ṭan maite leh raltlanin a tih loh tawp tur ruihhlo tawlh rute an awm ta a, hei vang hian raltlan kan dawnsawn dan pawh uluk zawka ngaihtuah ngam a hun ta hle.

Chenna, ei leh in, damdawi leh mamawh danga kan ṭanpuina hi chu chhunzawm zel ila, chutih rualin awm khawmna bîk nei loa an duhna apianga an kal darh theih chuan harsatna tam tak a thleng thei a. Ruihhlo leh sorkar phal loh dang tawlhna remchang pawh a ni pah thei bawk a, raltlante enkawl chhunzawm zel dan turah fing tak, fimkhur leh huaisen taka ke pen ngam a hun ta hle a ni.