Covid-19 leh kan kawngpui

Chief minister leh PWD enkawltu minister ni bawk chuan tun hnai khan Buichali leh Khamrang inkara National Highway (NH)-54 chhe laite leh NH-154 (Bairabi kawng) siamṭhat dan tur a enfiah a; Covid-19 vangin Mizorama kawngpuite chu a ṭhat tur anga a ṭhat theih loh thu a sawi. 

Covid-19 hian khawvel a tibuai a, chumi tuartu zingah chuan Mizoram pawh kan tel ve. Kan inkhawm thei lo a, zirna in kan hawng thei lo a, sumdawnna zawng zawng a buai a, kan ei leh bar zawnna lamin a tuar a, vanduaithlak takin kan kawngpui lehzelin Covid-19 a tuar hi chu a pawi takzet a ni. 

Covid-19 avangin kan con­tractor-ten hnathawktu tur labour an nei lo a, kawngpui an siam thei lo a, mipuiin kan tuar hi thil pawi tak a ni. Hei bakah hian contract inpek vêl danah pawh Covid-19 vang bawkin harsatna a thleng leh a nih hmel a. Covid-19 avanga kan inkharkhip avanga contract inpek dan a buai thu kan chief minister meuhin a sawi avangin kan pawm phawt mai a ngai ang.

Engpawhnise Covid-19 hi kan tuar a, kan kawngpui lehzelin a lo chhiat phah hi chu Covid-19 hi a huatthlala zual a; kawngpui ṭha siam min tiamtu leh rorelna in sanga kawngpui ṭha kan neih avanga lawmthu sawina pu lut ruptu sorkar kan neih laia kan kawngpui zingah pawh a pawimawh ber, kan châk lak luhna kawng a chhe leh ta viau mai hi a vanduaithlak hle a ni.

Covid-19 hri hi a reh hunah, kan harsatna tam tak hi chinfel a ni ang a, kawngpui ṭha zawk pawh kan neih theih i beisei phawt mai ang u.