PMJVK leh Mizoram sorkar

Sorkar laipuiin minority-te hmasawnna rulhrel dinna atana a ruahman Pradhan Mantri Jan Vikas Karyakram (PMJVK) chu Mizoram pawhin lian tham takin a kalpui mek a, project 70 a kalpui tura pawm zinga 63 chu sport project a ni.

PMJVK hi a tira an duan danah chuan zirna, hriselna, skill development leh hmeichhe dinhmun chawikanna atan chuan hman theiha tih a ni a, tun hnaiah a hman theih dan siam belh niin chung zingah chuan sport pawh hi a tel. PMJVK hman theihna dang chu sanitation, solar energy leh drinking water project lamah a ni.

State sorkarin a ngaih pawimawh hrang hrang a awm a, a mamawh pawh a awm bawk a, Mizoram sorkar chuan sport a ngai pawimawh hle tih a hriat theih. Mizoram sorkar hian PMJVK hnuaiah hian project dang pawh an theh lut turah ngai ila, chung zingah chuan sport project lam hian pawm a hlawh fal deuh pawh a ni thei.

Sorkar laipuiah minority-te hmasawnna atan sum ṭhahnem tak dah a ni a, chu sum chu kan mamawh dan azira hai chhuah theih a ni. A hman theihna dangte hi Mizoramin kan mamawh em em thil a nihlaia health, education leh skill development lamah project kan nei lo hi chu a changtu Minister leh department-te thiam loh nge, a hotu lu Chief Minister thiam loh zawk, tunge kan dem dawn le?

Sport project neih hrim hrim hi sawiselna tur lam ni loin thil lawmawm a ni. Chutihlaiin project dang kan nei tel lo lutuk leh state dangin an nei si hian sawi zui a hlawh deuh a, PMJVK kan hman ṭangkai dan hi state-in a ṭhatpui dan zawnga ennawn theih ni se ṭha hle ang.