Kohhran inkhawmpui leh eirukna
Mizoram Synod hnuaia inkhawmpui lian ber dawttu, Presbytery Inkhawmpui chu tun hnai khan a ṭiak a, Presbytery eng emaw zat chuan Mizorama eirukna hluar zel do duhna lam hawi agenda an neih chu pawmin Synod inkhawmpuia ngaihtuah zui zel turin an pawm.
Presbytery ṭhenkhatah chuan a thlawna thil sem leh dâwn tihtawp a nih theihna tura hmalak duhna agenda an pawm a, contract hna hralh chhawn tihtawp a nih theihna atana hmala tura duhna agenda-te pawh a awm. Hei bakah hian smuggling tihtawp duhna, inthlanna fel leh thianghlim zawk neih duhna lam hawi agenda-te pawh a awm bawk.
Kohhran inkhawmpui ni si politics rawng kai agenda ṭhahnem tak a lut leh eiruk dona lam hawi agenda a awm nual mai hian ngaihtuah a tithui a, 'Kan kohhranten siam ṭhat duhna rilru an pu,' tia a lawmawm zawnga thlir theih a nih laiin, 'Kohhran meuh pawh ngawi thei tawh loin inkhawmpuiah an ṭawng chhuak,' ti zawngin a thlir theih bawk ang.
Kan thlir dan ki chu eng pawh ni se kan ramah heti taka eirukna a hluar ta hi tihtawp dan kan zawn tlan a ngai. Contract hna inpek hralh chhawn chu ngaiah neiin thil tihphung pangngaiah kan nei chho tate hi a pawi takzet a ni. Tunah hian hna hmutu hming leh a taka thawktu a inang thei tawh lo a, a karah thawk ve miah loa pawisa lo ei ṭhin an awm bawk nen, kan ram hi a damlo a ni.
Ram siam ṭha turin sorkar tha chakna mai a tawk lo thei a, eptu lamte pawhin an tih tur huaisen leh chak taka an tih ve a ṭul. Kohhran pawh an inrawlh a ṭulna chin a awm tawh ngei ang - kohhran Inkhawmpui agenda en hian kan ram hian siam ṭhat a mamawh hle tih hai rual a ni lo ang.