Sorkar tan chona thar

Aizawl khawpui dái, Lungverh hmuna National Disaster Respond Force (NDRF) mi leh sa Covid-19 vei zingah phai aṭanga rawn lut thar ni lo an awm a, chuvang chuan Lungverh leh Sairang Dintharah total lockdown puan a ni. NDRF mi leh sa Covid-19 vei chungchangah hian sorkar thuchhuak leh Lungverha YMA leh 5th IR hotute hriat dan inang lo a tam hle. 

Covid-19 dona kawnga state ṭang rual ber hi thlan theih ni ta se, Mizoram hi a ṭang rual ṭha ber kan ni hial ang. State tam takah mipuiin sorkar thlawp chu sawi loh sorkar thupek ngei an bawhchhiat laiin Mizoramah chuan a mipui zawkin khauh taka kal tura sorkar an nawr chang a awm a, sorkar pui turin mipui zinga mi ngeite mahni insengsoin ramriah leh khaw chhungah an duty a, mipuiin sorkarah sum ṭhahnem tak an thawh bawk a ni. 

Sorkar leh Mizo mipuite kan ṭan rual ṭhat a, kan thu kan in ngaihchan tawn ṭhat tehlul nen, tun hnaiah hnam dang sipai state pawn aṭanga rawn hawte zingah Covid-19 positive an awm tih hmuh chhuah a ni a, heng mite hi state pawn aṭangin an rawn haw tih an awmna vengte'n an hre lo niin a lang a, a zialo hle a ni. 

Hei mai hi a ni lo a, state pawn aṭanga rawn hawte hi dan angin an inkhung hrang ṭha lo hle niin a lang a, mipui vantlang nen an inkawm thute leh dawrahte pawh an kal tihte thlengin report a awm ta nawk a, kan hnam dang sipaite hian kan state sorkar leh khawtlang inkaihhruaina an zawm lo tiin a puh theih. 

Kha leh chen in­­kharkhipin chhung­kaw tam tak ei bar zawnna tibuai khawpin kan ṭang tlang a, hnam dang sipai thuawih lo tlem tê avangin Covid-19 hi vantlang zingah lo darh palh ta ang se Mizo mipuite tan a huatthlala viau dawn a ni. Hei vang hian sorkar hi sorkar taka a chet pawh a ṭul ta a, sipai pawh ni se Covid-19 inkaihhruaina bawhchhiaa quarantine tiṭha lo an awm chuan hrem ngam a ṭul a, sipai thuneitu sangah te thlena bawhzui zel a ṭha ang.