SEDP Board senso

Mizoram sorkarin an flagship programme Socio Economic Development Prog­ramme Board (SEDP) policy tipuitling tura a din, SEDP Board 14-te hnenah kum 2022-2023 chhunga an inenkawlna senso atan cheng nuai 303.93 a pe a; board vice-chairman zinga MLA ni lo palite hlawh atan kum khatah Rs 19,20,000 sên a ni.

Mizoram sorkar hian budget a hmuh ang te hi ram hmasawnna turin a duh angin a hmang thei a, ram tana ṭha tura a ngaih angin sum hmanna tur ruahmanna a siam mai ṭhin. SEDP Board pawh hi hna­thawk thei tur leh ram tana ṭangkai tur a hriat angin a din a, a senso turte pawh a chhut chhuak sâ vek a, hei hi sorkarin a duh ang taka a duan a ni.

MNF kaihhruai sorkar hi kum li a tling dâwn hnai tawh a, SEDP Board pawh an nihna chiang takin mipuiin an hmù ta. Sorkar lam inhmuh dan leh mipui thlir dan erawh a inang lo deuh mai thei a, sorkar chuan SEDP Board hi ṭangkaiah ngaiin ṭhiat loin a la kalpui chhunzawm zel a, kum khatah cheng nuai 300 chuang SEDP Board tán a la dah a ni.

SEDP Board enkawltu Vice Chairman-te hian hnathawhna turin lirthei an dawngin an kawl deuh vek a, an hnaa puitu tur staff an neih bakah office hranpa neiin inrelbawlna an nei hrang thlap a ni. An kalphung hi a fuh leh fuh loh thuah thui tak inhnial theih a ni ngei ang a, engpawhnise cheng nuai 300 sen phahna atana ṭha tawkah sorkar chuan a la ngai zel a ni.

SEDP Board Vice Chairman nih avanga mipui thlan tlin ni lem lo sorkara mi pawimawh ni ta thutte pawh an awm a, he board tho hi MLA ni si nihna hranpa nei lo tán nihna pekna remchang a ni tel bawk. SEDP Board din a nih hnu hian an enkawl department hi an chak phah sawt nge sawt lo tih hi mipui lamin an thlir ve reng a ni.