Health care bill bâ
Mizoram State Health Care Scheme (MSHCS) hnuaiah Mizoram sorkarin damlote inenkawlna senso a bat rei lutuk avanga mipui thlàvang hauh nan Mizoram Pradesh Youth Congress Committee chuan high court-ah zualko zel an tum a; an hmalakna thláwp turin mipui an ngen.
RTI Act hmanga zawhna sorkar lamin an chhhanna aṭanga a lan danin MSHCS-in mipui pawisa a bat mêk hi cheng vaibelchhe 70 chuang a ni.
Tun hnaiah sorkarin health care bill ba rulhna turin pawisa pek chhuah a rem ti a, an pawisa pek chhuah tur hi cheng nuai 400 a ni. He pawisa sorkarin a pe chhuak tur hi a lawmawm a, chutih rualin June, 2021 hnu lama bill ba erawh a la rul zo dawn lo niin a lang.
He pawisa hi sorkarin a intiamna dang, "Chuti zat chu kan sem ang," tia a sem leh loh ang ngawt hi a ni lo a, mipuite hi sorkarin dan anga inziak lut tura a tih, MSHCS hnuaiah dan ang thlapa inziak lut an ni a, a sorkar zawkin mipui hnenah damlo inrnkawlna senso a pe chhuak thei lo hi a fel lo takzet a ni.
Hetihlai hian sorkar hian thil dangah pawisa fai a semin a sem chhuak mêk bawk a, damlo mangangte pawisa ba ṭun chunga thil danga pawisa sem hi thil inhmeh lo tak niin a lang.
Engpawhnise kan sorkar court-a kala vaukhan a ngaih tak chhan hi thil dang ni loin a khúa leh tuite damlo inenkawlna bill a bat sak reng vang a ni a, damlo rethei leh harsa zawkte tawrhna hi a na hle a ni.