Kan history leh mithiamte

Mizo History Association (MHA) chuan, Chivu, Manipur-ah Manipur lal ṭhin Chandrakirti Singh dam lai lungphun, Chibu Stone Inscription-ah Manipur lalte'n Lushai lal 112 an tukdawl anga tarlan a nih thu sawiin, "Hei hi thu dik a ni lo," an ti a; lungphun chu thu tlinga pawm lo turin Archaeological Survey of India (ASI)-ah an thlen thu an sawi. 

Mizote hi kan tun hma hun chhui thui tur kan neih loh tehlul nen, kan neih chhun ang angte pawh hi ziaka chhinchhiah a ni meuh hlawm lo. Kan history pawh hi a hrilha in hrilh chhawn a nih deuh vek avangin ziaka awm chhun ang ang pawm mai hi kan sam hle a, chik zawk leh uluk zawka zir chian hi thil pawimawh tak a ni. 

Tun hnaiah MHA lamin kan history dik lo taka inziakna zir chianga thuneitute hnena pawm lo tura an thlen hi an fakawmin an chhuanawm a, hei hi mithiamte pawimawhna tak pawh a ni ang. He thilah mai ni lo, kan history ziak dan dangah pawh tun aia thuk zawka mithiamte an inrawlh chhoh zel a, tuna kan pawm chinte pawh hi a dik leh dik loh zir chianna (research) neih chhoh zel a ṭha hle. 

Chhinlung aṭanga chhuak anga kan insawi te, tuna Myanmar ram lo ni taa kan khawsak laite leh kan thlang tlak zel dante pawh hi a khawilaiah mah hian ziaka fel taka chhinchhiah awm tak tak lo niin a lang a, hengte pawh hi tunlai thiamna hmanga uluk leh chik zawka a hunlaia khawvel dangte nena khaikhin chunga zir chhoh zel a ṭha khawp mai. 

Mizo history a ni emaw, Mizoram history pawh ni se min awptu Sapho ziak ang diak diak pawh hi a ni vek lo thei a, historian leh writer pawh ni bik lo, Sap sipai hotute thuziakte innghahna atan kan hmang lo thei si lo a, history ziak dan dik leh fel zawka dah tura zir chian chhoh zel ni se a ṭha khawp mai. 

Mahni history pawh hre chiang mang lo hnam nih a zahthlak a, kan mithiam zawkte'n ṭan la thar zel se, Mizo leh Mizoram history dik leh changtlung zawk ziak zel turin ke pen zel se a lawmawm khawp ang.