Kawng chhawng siam hma flyover

Tun hnai khan Chief Minister hoin hmasawnna ruhrel siam tur hrang hrang sawiho a ni a, sawiho zingah Aizawl hmun pahniha flyover bridge siam dan tur te, truck, bus leh maxicab din khawmna (terminal) siam dan tur te, tourism tihhmasawnte leh thil dangte a tel.

Aizawl khawpui hi traffic a jam nasat avangin mipuiin harsatna namen lo an tawk a, Covid-19 hripui a ziaawm hnuah nunphung pangngaiah let leh mekin traffic pawh a jam leh nasa tawh hle.

Tuna kan Chief Minister hi traffic chinfel dan tur ruahmanna nei ṭha tak a ni a, kawng chhawng siam tura ruahmanna a neih bakah traffic jam awm tawh lohna leh parking lama harsatna awm lohna khawpuia siam tumna nei a ni a, a nghahhlelhawm hle a ni.

Tunah hian a tum angin kawng chhawng la siam thei lo mah se kawn lûn deuh laiah flyover siam tuma hmalakna a awm hi a lawmawm a. Hei hi tihhlawhtlin a nih hunah chuan traffic jam nasa zualpui pawh thui takin a chhawk theih a beiseiawm.

Hetihlai hian mipui beisei leh nghahhlelh em em chu kan Chief Minister zahawm tak hmathlir anga kawng chhawng indawh phei zui mai neih a ni a, flyover-ah mai hi chuan an lung a awi kim thei lo ang.