Anthurium Festival

Mizoram sorkar buatsaih ni hnih awh Anthurium Festival chu tun hnai khan Reiek Tourist Resort-ah hman a ni a, kum hnih zet hripui avanga hman theih a nih loh hnuah Chief Minister hoa hman a ni.

Anthurium Festival hian kum tin sawi a hlawh ṭhin a, mi tam tak chuan a lo chhuah dan leh a kalphung an hriat chian loh vang a ni thei ang. Kan rama tualṭo pangpar hming pawh ni lo puala kut hman hian sawi a hlawh a, a sum sen tamzia sawiin an ui ṭhin. Thil danga hmana a ṭhat theih dante an sawi ṭhin.

Hetihlai hian sorkar laipui aṭanga kut hmanna tur bika sum lo kal, a hmanna tur bika hman a nih chuan tawng­pawng sawisel ngawt chi a ni lo ang; amaherawhchu kan hman dan leh a kalpui danah hian duhthusam lo thil tam tak a awm thei a, rawtna thar awmte pawh ngaihven peih se a ṭha hle ang.

Kum tin mai a tih dan phung pang­ngai, a hmunhma leh a kalphung pawh pangngai deuh pet petin a kal rei ta a, a tum ber khualzin hip kawng­ah kan thawh hlawk tawk lo niin a lang bawk.

Heng thilte hi sorkar lam hian ngun takin ngaih­tuah se, kum dang­ah kan hmang leh zel dâwn a nih chuan kalphung thar ṭha zawk pawh a awm thei ngei awm si a.