Kawngpui chhia leh sorkar

Thenzawl leh Lunglei inkar kawngpui a chhiat em avangin YMA Sub Headquarters, Lunglei bultumin October 18, 2022 khan Lunglei district chhungah lirthei hmanga veivah phal loin 'No Vehicles Day' hman a ni.

Lunglei district luhka ber kawngpui hi ṭum eng emawzat a lo chhe tawh ṭhin a, siam ṭhat ni ve bawk mah se a tlo lo ṭhin hle. Tun hnaiah hian a chhe leh nasa tawh a, lirthei te chi tana veivah harsa khawpin a chhe leh tawh a ni. Lirthei lian tan pawh tlan a harsain chet sual mai hlauhawm theiin a awm hial a ni.

Kawngpui enkawl hi a awlsam lo tih chu tlang hriat a ni. Congress-in sorkar an enkawl laia kawngpui chhia avanga au nasa tak MNF-in sorkar an enkawl leh mek a, eng teh ual an ni bik lo tih a lang. Kawngpui siamna tur sum a awm chung pawhin an siam hleithei lo ṭhin hi thil mak tak a ni a, an siam chhun a tlo lo zel mai hi a mak lehzual.

Tunah zet chuan Lunglei mipui tawrhna a nasa ta a, YMA pawh ngawi thei tawh loin an au chhuak ta a ni. YMA lam hi awmze nei loa sorkar nawr an ni lo a, vawi tam tak thuneitute hnenah an lo kal tawhin thu an thlen tawh a, an thu thlenin awmzia a neih loh avangin 'No Vehicles Day' an hmang ta hial a ni. Mizoramah kawngpui chhiat em avanga 'No Vehicles Day' hman ngai hi awm tawh lo se, sorkarin ṭan a lak a ngai hle a ni.