Kawngpui chhia sawifiahna

MNF ṭhalaite chuan thuchhuah siamin, NH-54 Kawnpui-Kolasib inkara kawngpui chhia chungchang an sawifiah a; kawng chhia entu Congress ṭhalaite leh Congress party chu kawngpui chhia sawisel ngam tur an ni loa an ngaih thu an tarlang. 

Mizorama kawng­pui pawimawh a ṭha rei hleithei lo hi a pawi hle mai a, a sawifiah tura ruling party lam an rawn lang nawlhte pawh hian ngaihtuah a tithui khawp mai. Congress a ni emaw, MNF hunlai pawh ni se kawngpui hi an siam hlim chuan a han ṭha ve zawk a, party mi leh sate pawhin phur takin kawng ṭha thlalak an thehdarh ṭhin a, Assembly House-a lawmthu sawina pu lutte pawh an awm hial a ni. Nimahsela fur khat a liam a, a hmaa kawng chhia sawisel ṭhintute ngei pawhin kawngpui ṭha min pe hleithei lo hi a pawi khawp mai. 

Tun hnaia Kawnpui-Kolasib kawngpui lo chhe leh ta hi thil thar a ni lo a, Congress hunlai pawh khan a chhe ṭhin tih kan la hre vek a; Congress ṭhalaite'n kawngpui chhia an zuk tlawh MNF ṭhalai lamin, 'sawi tur an nei lo,' an han ti mai pawh hi a mak lem lo ang. 

Thil mak tak thleng fo erawh chu political party ṭhalaiin sorkar thil pawimawh an sawifiah fo mai leh, sorkar sawi tur ni awm tak an rawn sawi zawk ṭhin hi a ni. MNF ṭhalaite hian tender kal chhoh dan kimchangte an tarlang thei a, Ministry of Road Transport & Highways kut aṭanga a kal dante thlengin an hre kilh kelh thei hi thil mak tak a ni. 

Mizoram mipuiin an duh chu kawngpui ṭha a ni a, kawngpui siam theih loh thu leh a chhiat tawh hnua insawifiahna hi chu mipui hian kum tam tak an lo ngaithla tawh a ni.