Assam smuggler leh Mizoram sorkar

Tun hnai khan Cachar Police-te chuan dan loa kuhva raha sumdawnnaa a meizang hlaptu ber, Musa Ahmed Siddiqui an man thu an puang. Amah hi Karimganj lam mi a nih thu leh Mizoram aṭanga hna a thawh tawh zawk thu te, kum khat chuang an zawn hnuah Silchar Airport-ah an man thu Cachar SP-in a sawi.

Hetihlai hian Musa Ahmed hian Mizoramah vote a lo nei reng tawh tih press conference-ah tun hnai khan ZPM PAC member pakhat chuan a sawi a, "Musa Ahmed Siddiqui hian Aizawl West I biala Sairang III polling station-ah vote neiin, serial number 448, Voter ID No. GDP0094425 a ni," a ti.

He thil hian Mizo mipui a barakhaih takzet a, dan loa kuhva rah tawlhnaa a hotupa (kingpin) tia an puh hi Assam Police lamin man tumin an veh ngar ngar a, chutihlaiin Sairang lamah inbeng belin vote hial a lo nei hman.

Musa Ahmed man a nih hma hian a thurualpui nia puh Abub Mazumdar chu kuhva rah tawlh ruk chungchangah bawk Assam Police-te'n an lo man tawh a, ani hi bail-a chhuah lailawk a nih chhungin Kolasib-ah Mizoram sorkar function pakhatah hmuh a ni a, Minister pakhat ina chaw a eilai thlalak hmuh tur a awm bawk.

Assam lamin smuggler an tih, an thil tihsual avanga man tawk pahnihte Mizoramah an zalen em em mai hi a mak a, chhui chian ngai a ni. He thil hi politics lama inbeihnaah chantir loin hnam thil serious tak ni zawkin a lang ang. Kan rama pawl lian tak takte pawh an ṭawng chhuah ngam a hun a, kan ram leh hnamin humhalh a mamawh hun pawimawh kan hmang mek a ni.

Mizoram chhunga hnam dang sumdawng kan ngai­mawhin tlawm­ngai pawl ṭhen­khat chuan an hnawt­chhuak hial a. Chutihlaiin an chenna Assam pawhin 'smuggler' tia an mante Mizo­rama an duhthala an che ta mai hian Mizo hnam an zah lo a, min pawisa lo a, min hlau lo hle ti zawngin a ngaih theih.

Engpawhnise he thil hi titi leh politics-a inpuh tawnnaah tawp mai lo se, Mizoram sorkar hian a nihna tak chhui chhuak se. Smuggler-te lakah hian dan angin hma la ve ngam se, an kalpui zel dan hi mipuiin an thlir reng dawn a ni.