Nlup, SEDP leh Mizoram budget

Agriculture minister chuan tun hnaia a thusawinaah kut hnathawktute awhawma siam an duh thu a sawi a; SEDP hnuaia kuthnathawktute tana hmachhawp hmasaah SEDP hnuaiah cheng vaibelchhe 4000 an dil mêk thu a sawi.

Mizoramah tun hnaiah kum 10 chhung Congress-in rorelna vawn fung an chelh a, hemi chhung hian NLUP hnuaiah hmalakna lian tham tak a awm a, sum pawh ṭhahnem tak hman a ni. NLUP kha a hlawhtling nge hlawhtling lo tih chu pawisa sen zat leh a rah chhuah aṭang hian chiang takin a hmuh theih. NLUP kalpui a nih hma leh a nih hnuah kuthnathawktute dinhmun a danglam nge damlam lo tihte leh NLUP kha eng ang taka hlawk nge a nih tihte chu Mizo mipuiin kan hre chiang ber awm e. 

Tunah MNF-in rorelna an kalpui ve leh ta a, ṭun thlenga an sawi uar ber chu SEDP a la ni deuh mai. SEDP atan hian kan sorkar budget-a sum awm sâ ṭhahnem tham tak chu an chhep hrang a, sorkar department-in ni danga an tih ṭhin pangngai ang tho an kalpui pawhin, 'SEDP hnuaia tih' tiin an puangzar chiam ṭhin a, SEDP chu lian taka lantir zel an tum a ang hle. 

SEDP hi sorkarin a ngai pawimawh hle tih a lan chianna chu sorkarin hripui lêng avangin sum leh paiah harsatna a tawk a, kan sum dinhmun chu 'Pathian chauhin a hria' tih khawpa a awm tawh hnu, sorkar hnathawk hlawk pûk a nih a, mipui aṭanga a sorkar zawkin sum thawh khawm tura kut a dâwh meklai pawhin SEDP pawisa chu khawih chet niin a lang lo!

Heti taka sorkarin a ngaih pawimawh SEDP hi a nihna tak sawi chiang fak thei emaw, sorkarin a kalpui dan tur fel taka puan emaw hmuh tur a vang hle. Heti hian hripui lenlai pawhin mipui sum kan state budget-a mi hi 'SEDP sum' tiin kan khawl zel ang a, inthlan dâwn hnaihah an 'sem' chho dâwn a nih chuan kan ram tana ṭha tura duan SEDP hi khuareia kan ram chhiatna thlentu a ni palh thei. 

Agriculture lama SEDP hnuaia hma chhawp hmasaa an dil chin ringawt pawh cheng vaibelchhe 4,000 chuang a ni a, 2019-20 state budget lama SEDP pawisa an khawl sâ, an la khawih chet loh ringawt pawh cheng vaibelchhe 200 dâwn a awm sâ. Heti a nih chuan Covid-19 dona atana sorkar hnathawk hlawh pûk chhun­zawm tawh lo hian SEDP lama pawisa awm sâ lo pûk maite pawh hi a rem lo em ni?