Halpuah khap huam zau zawk

Tun hnai khan Home Minister hoin Diwali, Krismas leh kum thar vuakvetah halpuah, halmawi leh silai lem a mu kap chhuak theite khap an rel a; sipai hmunah hakpuah hal a nih lohna turin khapna thupek pek an rel bakah check gate tinah uluk zawka lirthei lo lutte endik ni se, an ti.

Kum 2021 khan khapna thupek hi khauh taka chhuah a ni tawh a, chutihlaiin kum hlui thlah zanah erawh khap loh ang maiin Aizawl khawpuiah halpuah, halmawi leh a hal chi thil dang an hal nasa hle. Sorkar mai ni loin tlawmngai pawlte nena ṭan lak a ni chungin a sawt vak lo emaw tih mai turin a awm a, chutihlaiin khap ni lo lek phei se a puak nasa khawp ang.

Kuminah chuan khapna hian a huam zau lehzual ta. Diwali-ah pawh puak thei thil huaisen taka khap a ni hi a ṭha a, state dang tam tak pawhin halpuah lam chi hi an khap dawn a ni. Hei bakah hian sipaite an hmuna hal lo tura khap a ni tur pawh hi a lawmawm a, an hal lui a nih chuan sorkar hian dan angin action la ngei bawk se a ṭha hle ang.

Halpuah hal hian boruak a ti­bawlh­hlawh a, hriselna atan a pawi a ni. Ran vulh pawhin an tawrh phah ṭhin avangin khap ngei chi a ni a, chutihlaiin khauh taka khapna thupek hnuaiah a hal lui an tam ṭhin nen a haltu man an tlem ṭhin erawh sorkar a ṭan deuh a ngai ang. Khapna thupek chhuah a awl a, a taka kenkawh hi a harsa ṭhin si a.