Khawtlang hnatlang kawngpui siam hi

Tun hnaiah Dampa bial huam chhunga hmun hnihah khawtlang mipuiin hnatlangin kawngpui an siam a, West Phaileng leh Dapchhuah inkar bakah Kanghmun leh Lungphun inkarte siam a ni.

Khawtlang mipui ṭang rualin kawngpui an siam ṭhat reng reng hian politics-a inchirhthehna hmanruaah hman a ni fo tawh ṭhin a. Sorkar chak loh leh tih ṭhat loh avanga thleng a nih pawhin khawtlang mipuiin kawngpui ṭha an duh avanga an hnatlang hi chu politics-a kaih luh loh a ṭha zawk ṭhin ang.

Mahni veng leh khua thianfai turin khawtlang hnatlang koh a ni fo a, sorkar tihfai leh vil turah dah a ni lem lo. Sorkarin a tifai tur mi a rawihna hmunah ngei pawh hnatlanga faina hna thawh a ni fo tawh. Heng hunah hian sorkar demna leh relna lam sawi chhuah a ni kher lo a, khawtlang mipuiin an veng leh khaw tana ṭha an duhna an lantir tih kan pawm tlang a ni.

Kawngpui ṭhenkhat hi chu siam ṭhat eih loh chuan lirtheia zawh ngam mang loh khawpin a chhe ta. Sorkar mawhphurhna ni mah se a sorkar berin a siam ṭhat miau loh chuan a hmangtu mipui an pen chhuah a ṭul ta a ni.

Mipui hnatlangte hian sorkar an timual­pho a ni lo a, sorkar an beih duh vang pawh a ni lo; an beisei ang kawngpui ṭha an neih loh avang leh a siamtu tur lamin an siam theih mai si loh avangin hman theih turin an chei ṭha tih hi pawm tlang thiam ila a ṭha hle ang.