Hna hmanhmawhthlak

Sorkarin mau chi supply a kalpui chhan a sawifiahnaah sorkar thuchhuah chuan, "Hripui leng karah pawh Mau chingtuten kum an hloh lohna turin mau phun tur ngaihtuah a ngai a. Mau chingtute hnenah mau chi pek a nih theih nan Horticulture Department chuan Finance Department-in, The Mizoram Public Procurement Rules, 2020 (Procurement of Goods, Works and Services) a siam angin tender hi sorkar phalna thlapa koh a ni, " an ti.

 

June thla khan Horticulture Depart­ment hnuaia mau leh raw chi supply hun chu a tawp a, dan angin an han kalpui dawn ta a, mi pakhat chiahin a chhang ta a ni. Hei hi sorkar danah chhangtu tling a ni ta lo nge ni, an hmanhmawh tehlul nen tun thleng hian mau chi supply-tu tur hi puanzar a la ni lo. 

Hripui lenlai leh mipui nawl­pui pawhin hri dona atana pawisa an thawhkhawm vanglai takin Mizoram sorkara Sports Department chuan MSSC hnuaia cheng nuai 800 chuang man hna an lo pe bawk a; sorkarin a sawifiahnaah chuan hna hmanhmawhthlak a nih thute tarlan a ni ve leh bawk a ni. 

Heti taka sports lama hna hmanhmawhthlak a han awmte pawh hi thil danglam tak chu a ni a, Covid-19 avanga khelmualte an khar ṭhup lai leh inelna (competition) reng reng kalpui khap a ni chunga cheng nuai 800 chuang hna thawhna tur khawpa hmanhmawhthlak hi chu thil hrilhfiah nawn ngai tak a nih hmel. 

Engpawhnise kan sorkar flagship program meuh ni si, mau chi supply-tu tur tender kohnaa mi pakhat chiah a rawn pen chhuak hi hriatthiam harsa tâk chu a ni phawt a, chumi piah lamah tender koh an hmanhmawh tehlul nen an ngawihpui leh ta vang vang leh si hian Zoram mipui ngaih a tiṭha lo lek lek tawh niin a lang.