Mizoram theihna

Chief Minister chuan Mizoram chhungah mipui châwm zo tur, hman ṭangkai theih ram zau tak, sik leh sa, ruahtui duhthusamte chu en liam mai loh tur a nih thu a sawi a, "Economy hmasawnna atana hman ṭangkai theih vek a ni tih rilru pú a, a nachang hre tura ngaihtuahna thlak a ṭul," a ti.

Mizoram Chief Minister hian kan ram ṭhatzia hi a hmu chiang hle mai a, hman ṭangkai theih a nih thu hi vawi tam tak a sawi tawh. Kan ram leilung ṭhatzia leh a hman theih dante hi mipui hriatah a sawi fo tawh a, sorkar mi pawimawhte pawh a hrilh tawh ṭhin. Ani berin a hmuh chian bawk avang hian ṭangkai taka hman theih a la nih ngei i beisei ang.

Kan ram theihna sanzia te, thlai leh thil dang a ṭhat theih dan te, ruah tui kan neih ṭhat thute hi kan inhrilh ngun rual hian a taka hman ṭangkai a ni lo hi a uiawm hle. A ṭhatna leh theihna hretu Chief Minister kan nei chunga tun thlenga a theihna anga kan la hmang chhuak lo hi a chhan zawn chhuah a ngai ang.

Kan ram hi kan sawi ang taka ṭha a nih chuan din chhuahpui tham eng emaw tal hi chu kan hmuh fuh a hun ta. Kan sorkarin mau leh rua a buaipui pawh hi kan Chief Minister vision ang a nih chuan kan eco­nomy chawi kang theitu tur a ni a, hei hi a tak ram changin kan state hian hmasawnpui thei tawh se tih hi a nghahhlelhawm takzet a ni.

He ram ṭhatna leh theihna hi kan ram hruaitute hian min hrilh nawn fo mah se a taka thawk chhuak tura ruahmanna a awm a ngai a, a ṭhatna anga hman chhuah a hun ta.

Tunah hi chuan ram ṭha nia sawi pawh ni bîk lo state dangte awt reng rengin kan awm a, kan ram ṭhatna ha hipa kan sawi fo hi a nihna angin i hmang chhuak tawh ang u khai.