Raltlan, Mizoram sorkar leh sorkar laipui

Central YMA leh Central Young Lai Association (CYLA) hruaitu ṭhenkhat USA-a zin mekte chuan Myanmar aṭanga Mizorama ráltlânte chungchanga an hmalakna leh ṭanpuina awm theite US State department hnuaia Bureau of Population, Refugees and Migration hotute tun hnai khan an sawipui.

Myanmar tual­chhung buaina avangin Mizoramah raltlan ṭhahnem tak an awm mêk a, Mizoram mipuiin ṭha takin an lo dawng­sawng. Heng raltlan zinga ṭhenkhat hi chu Myanmar lamah an chho leh tawh a, ṭhenkhatin Mizoram aṭangin a remchan angin an huan leh lote an an vil a, raltlan ṭhenkhat inben bel tumin Mizoram hmun hrang hrangah an pêm darh ṭan mêk niin a lang bawk a, ṭhahnem tak chu tlawmngai pawl leh sorkarin a ruahman refugee camp lamah an la awm mêk bawk.

Ráltlânte hi tu dang ni loin kan unau, kan thisen zawmpui deuh vek an ni a, ṭha taka lo dawnsawn hi kan tih tur, a bata kan bat a ni. Mahni unaute mangang thlabara tlanchhiate lo tlanchhiatsan hi Mizo Kristian tan a thiang lo.

Hetihlai hian raltlan dawn­sawn dan leh enkawl danah a tirah ruahmanna a awm ṭha tawk lo a, inrin hman pawh a ni lo ve bawk nen tunah hian ráltlânte avanga harsatna thleng tam tak a awm ta. Heng harsatna lo awm chhan ber chu India sorkarin raltlan a dawngsawng duh lo a, ṭanpuina sum leh pai a pe ṭha duh lo a, ráltlânte hamṭhatna tur a ngaihtuah duh loh vang a ni ber.

Mizorama sor­karna enkawltu MNF hi sorkar laipuia BJP (NDA) thawhpuitu an ni a, tun ang hun hi BJP an thawhpui man hamṭhatna kan ramin a dâwn lêt ve hun tur a ni dâwn lo'm ni? Kan unaute ngei hläu thlabarin an rawn tlanchhia a, 'official' taka lo dawnsawn theih loh leh ṭanpuina mumal taka ruahman sak theih loh ringawt mai hi chu a state angin lungawi a har. Kan state sorkar hotute hian sorkar laipui enkawltu BJP lamah tun aia na zawka an nawr ngam a hun ta.

Tunah chuan US sorkarah hial zualko a ngai ta a, India ram chhunga kan harsatna tawh chingfel tur leh min pui tura sorkar dang pun ruai a ngai ta mai hian India sorkar min en dan a tilang mai lo mâw?