Mithiamte thiamna hman ṭangkai

Tun hnai khan Israel Embassy-a agriculture lam mithiam chuan Haulawng rama Indo-Israel Centre of Excellence for Fruits a tlawh a, kum tharah a hmun ngeiah serthlum chin dan Israel scientist-te'n an zirtir tur thute a sawi. He hmunpuiah hian serthlum, dragon fruit, thingfanghma, tomato,brocoli leh thil dangte chin a ni a, a chite pek chhuah ṭhin a ni.

Kan ram hi kan sawi ṭhin danah chuan thlai leh thei chi tin ṭhat duhna ram a ni a, a takah erawh chuan a eng thil mah hi ramin a hlawhtlinpui tham khawpin kan la thar lo. Kan ram aia hmun chheng chhe zawk, ro zawk leh thlaiin a ngeih loh zawk nia langahte hian hlawhtling takin thei leh thlaite an thar thei ṭhin a, hei hi thiamna hmanga thlai leh theite an enkawl nasat vang a ni ngei ang.

Mizoramah hian kan thlai leh thei chite a ṭha ber ber a ni lo a, tun hnaiah thlai leh thei chi ṭha zawkte lo luh belh zelin a rah pawh a ṭha chho tawlh tawlh niin a lang. Tun hmaa kan la thiam ngai loh thei leh thlai enkawl dante kan hriat belh zel a, hmasawnna lawmawm tak a ni.

Israel mithiam­te'n min rawn tlawh leh hmasawn zel tura zirtirna min pe hi a lawmawm a, thiamna hman ṭangkai hi a ṭul takzet a ni. Hetihlai hian kan sorkar ngei pawh hian mithiam ṭhahnem tak a kawl mek a, Agriculture Department, Horticulture Depart­ment etc-a kan mithiamte hi tun aia ṭangkai zawkin sorkar hian chhawr thiam se. A hmun ngeia kal chilha a taka an thawh chhuah tam theih dan tur duang se, mithiamte kan chhawr ṭangkai nasat poh leh kan thei leh thei tharte'n hma a sawn zel ang.