Grape wine kalpui zel dan tur

Chief Minister chuan tun hnai khan Champhai tlawhin Champhai Grape Growers Society (CGGS hmunhmate a tlawh a, a sorkar chuan grape chingtute hma ngaiin ṭan a la zel tih a sawi a, "Harsatna siam zawng leh tibuai zawnga kalpui kan duh lo," a ti. Grape wine hralhna turah project mumal tak siama hmalak a nih tur thu leh amah chu a bul ṭantu a nih angin Delhi thlenga hmala tura kalpui zel a tum thu a sawi.

Mizorama grape chingtute hi hman ni lawkah an thinurin an mangang em em a. An grape chin aṭanga wine siamte chu Mizoram sorkar tuneitute thupek angin man a ni a, a zuartute pawh pawisa chawitir an ni. Grape wine siamna winery lama mi man leh tihtawp awm si loin Aizawla a zawrh chhuahna lamah an man khawm chiam mai a, mipuiin nasa takin an sawisel a, sorkar pawh an dem hle.

Tunah erawh hman ni lawka a mantu sorkar lam khan an rilru an thlak ta tih a lang e. Chief Minister ngei hi grape wine siamna hmunah kalin a hralhna a buaipui tur thute a sawi a, grape chingtute tan a thlamuanthlak hle ang. Hman ni lawka man khawmtirtu ber kha hriat theih la ni lo mah se tunah chuan grape wine sawi mawi leh a hlawkna lam zawn a ni ta thung; kum khat chhung lekin thil a inthlak nasa ta hle a ni.

Tunah zet chuan grape wine hralhna turah buaina a awm tawh dawn lo niin a lang a, Chief Minister berin Delhi thlenga bawhzui zel a tum avangin eizawnna ṭha lehzualah a chang chho dawn a nih hmel.