Health Care Scheme rintlak kan nei em?

Tun hnai khan Raj Bhavan-ah Governor leh Health Department hotute an inkawm a, Health Department hnuaia Healthcare service hrang hrangte kalpui mek a nih dan te, ṭha zawka kalpui a nih theih dan turte sawiho a ni. Health Care Scheme hnuaia inziaklut an pun chhohna turin theihtawp chhuah a ngai tih Larsap chuan a sawi.

Mizoram sorkarin Health Care Scheme a siam a, mipuiin ring tawkin an inziak lut a, a tirah chuan mi ṭhahnem tak an inziak lut. Chhan hrang hrang avangin harsatna a awm ta a, sorkar lamin pawisa a neih loh avangin damlote bill a táng nasa em em a ni.

Sorkar buatsaih Health Care Scheme-a inziak lutten an beisei angin sum an hmù lêt thei ta lo a, cheng vaibelchhe tam tak sorkarin a batsak. Mizoram sorkarin pawisa a neih mai loh avangin Asian Development Bank aṭanga pawisa pukin ba rulhna atana hman tur niin sorkar thuchhuahah tarlan a ni.

Larsap ṭhahnem­ngaihna hi Health Care Scheme lama mi ṭhahnem zawk inziah luh a ni a, mipui lam hian an tana ṭha tura lang si inziak lut an tlem tial tial hi a chhan zawn chhuah a ṭha hle ang.

Mipuiin he scheme hi an ring tawk a nih chuan an inziak lut zel ang a, an ring tawk lo a nih erawh chuan inziak lut an tlem deuh deuh dâwn pawh a ni mai thei a, Mizoram sorkarin ṭan a lâk thar a ngai takzet a ni.