Sorkar hnathawk hlawh batsak chhan

Mizo National Youth Front (MNYF) chuan, state budget aṭanga chhûtin sorkar inrêlbàwlna (revenue expenditure) a sang em em a, hmasawnna hna thawhna tur (capital expenditure) a tlem avangin, hripui lêng dona atana sum sènso tur pawh capital expenditure aṭanga pawt loin, revenue expenditure (sorkar inrêlbàwlna sum) aṭanga tum a ni a, sorkar hnathawk hlawh pûksak a nih thu an tarlang. 

MNYF thuchhuah tarlan danin, 2020-21 budget cheng vbc. 10,715 aṭanga sorkar inrêlbàwlna tura beisei chu vbc. 9020.85 (84.20%) a ni a, hmasawnna hna thawhna tur (capital expenditure)-a beisei chu vbc. 1693.15 (15.80%) a ni. 

Covid-19 avangin ram pumin sum leh paiah harsatna a tawk a, Mizoram sorkar pawhin central aṭanga a sum hmuh tur zat a hre lo a, Finance minister pawhin kan sum dinhmun sawi fiah harsatzia a sawi tawh. Hripui leng hian chhungkaw tam tak tan ṭahna a thlen a, an eizawnna a tawp a, mi tam tak sum lakluh a tlem phah a; ngai awh leh chu sawi loh Covid-19 avanga sum leh paia tlachhe hlen tur chhungkua pawh an awm nual dawn niin a lang. 

Mimal nun a nghawng a, chhungkaw ei-bar zawnna nasa takin a nghing a, sorkar pawh a kal ngaiin a kal thei lo. Sorkar budget lamah hri dona puala sum dah sa a lo awm si lo a, hri do hi loh theih loh thil a ni bawk si a, mipui hnenah vehbur a khawn bakah sorkar hnathawkte hlawh a bat ṭhensak ta a ni. 

Sorkar hnathawkte hlawh bat ṭhensak chhan hi ruling party-a ṭhalai pawl lamin an rawn sawifiah teh daih a, a sorkar lam sawifiah aiin a remchang zawk pawh a ni mai thei a; nimahsela an sawifiahnaa capital expenditure khawih che lo thei anga kal tum tih hian SEDP-a an sum hman loha khawl hi a huam a nih chuan sawifiah nawn leh a ṭul hmel mang e. 

Sorkarin hri dona tur sum a nei lo a, chuvangin a hna­thawkte thawh hlawh chu a bat ṭhensak a, hetihlai mek hian sorkar hian SEDP-ah sum ṭha­hnem tak la khawih chet miah loh a dah ṭha reng tho si a, hengte hi an hmang hrih lo a nih chuan sorkar hian a hna­thawkte hlawh ba buai lo hian ama pawisa neih sa SEDP leh thil danga a khawl hi hmang thei se a ṭha khawp mai.

Sorkar hnathawkte hlawh hi mipui sum hnar lian ber angin a sawi theih hial ang a, eizawnna chân tate leh kalpui mumal thei lote tan eizawnna thar dap turin khawlaia sum leng vel a tam hi a pawimawh a ni. Hei vang tak hian sorkar hnathawkte hlawh aiah SEDP leh thil danga sorkar sum che loa awm mai mai hi ba ṭhen ta zawk se kan economy vir velah hian a ṭangkai thei zawk ang em?