YMA leh eiruk do
YMA Rorel Inkhawm vawi 3-na tun hnaia Thingsulthliaha neih chuan eirûkna leh hlemhlêtna a reh theih nan chak zawka hmalak an rel.
Mizorama pawl lian berin eiruk a do tur hi thil lawmawm tak a ni a, tihtakzet leh huaisen taka eiruk a do ngam a nih chuan awmzia a nei hle ang tih a rinawm. YMA-in eiruk an do tur thu a darh ruala social media lama Mizo ṭhalaite'n an rin loh thu an sawi chhuak nasa zui lutuk erawh a zialo a. Kan pawl lian leh pawl thianghlim tura rinin eiruk a do tur hi a lawmawm tehlul nen, nuih deuh chunga sawi zuitu an tam em em mai hi a pawi hle a ni.
Eiruk do sawi chhuaha Mizo ṭhalai an beidawng sâ deuh tlat mai leh do thei dinhmuna ding tawh lo ang deuh hiala an inngai hi a fel lo a, a do tumtu pawl lam na tak taka lo bei nghal an han awm bawk a. A eiruk do tak tak thlen hma pawhin tih tur kan ngah hle tih a lang chiang.
Hetihlai hian a YMA lam pawhin ṭan an lâk a ngai a, an member tam takin eiruk do tlak loah an ngai emaw tih theihin social media lamah chuan a lang. Hei vang hian YMA hi a thianghlim ta lo tihna a ni lo a, YMA hruaitu zingah thianghlim lo leh eiruka fihlim lo an awm vang mai niin a lang a, heng mite hi chu thiam taka an chawlh zui a ṭha ang.
YMA-in eiruk a do tawh dâwn avangin CYMA hruaitu inthlan dawna thianghlim tawk loa vote zawn te, voter phurh khawm leh intiamna neihte hi a zahthlak a. YMA lama nihna remchanga laa sorkara hamṭhatna (contract, supply leh thil dang) zawnte pawh tihtawp vek a ngai ang.
YMA-in eiruk leh hlemhlêtna a do dâwn avangin a dotu lam an intihthianghlim hmasak a ṭul dâwn a, chumi hnuah huaisen takin hlauh nei loin kal se, YMA eiruk do tur hi Mizoram hian a ṭhatpui ngei ang.