Sorkar lehkha pawimawh

Tun hnaiah thlipui (Cyclone Sitrang) avangin October 25, 2022-ah sorkar Pisa zawng zawng chawlh tur thu puanna thupek, Aizawl DC hminga siamtu leh social media-a thehdarh ṭantua puh PWD superintending engineer chu thubuai siamsak a ni. Sorkar thuchhuah tarlan danin hetiang hi dan kalh a nih bakah hremna na tak awm thei a ni.

Tun hnaia sor­kar lehkha siam danglam hi a lo chhuah dan hre lo mah ila pawi khawih tumna lam aiin fiamthu thawhna lam a ang lek lek a, a siam danglamtu hian sorkar laka pawi sawi a tumna lam a ni kher lo ang. Hei vang hian a thil tih hi sawi mawi leh sawi mam chi a ni lo a, mi tam tak nghawng thil a nih avangin harsatna lian tak a thlen a, mi tam tak chu a tibuai hle a ni.

Tun hnaiah sorkar lehkha pawimawh chungchangah thil thleng mak deuh deuh a awm fo mai a, sorkar lehkha pawimawh bîk ni si mipui hmuha awlsam taka darh a awm ṭhin a, a pawi hle. Ṭhenkhat chu sorkar tana pawi tak, sorkarna vawn fung chelhtu political party tan pawha huat theih turte a darh a, a pawi ṭhin hle a ni. Chutiang bawkin sorkarna siamtu party chhan thei tur leh sorkar thutlukna ṭantu lam lehkha pawimawh pawh awlsam takin a darh leh hluai ṭhin a, hengte pawh hi fimkhur a ṭha hle.

Tun hnaia thil thleng hian social media hman fim­khur a ṭulzia min zir chhuahtir se, fiamthu a ni emaw, tihsual luih vang pawh ni se awlsam taka chhui chhuah theih a ni tih hre chiang ila, thil dik lo thehdarh hi i sim ang u. Chutiang bawkin sorkar lehkha pawimawh, mi pawimawh chin hriat tur nia lang a hun hmaa thehdarh ṭhin pawh hi tawp thei se a ṭha hle ang.