Myanmar nena inkal pawh dan hi

Law & Judicial minister chuan, India leh Myanmar inkalpawhna leh insum dawn tawnna hmun Zokhawthar tlawhin Immigration Check Post buatsaih leh Integrated Check Post siamna tura pawimawhte a enfiah a, Immigration Check Post chu rei lo teah kalpui ṭan tum a nih thu a sawi. Insumdawntawnna chungchanga harsatna awm ṭhinte sorkarin a hriat reng thu sawiin, "Sutkian a niha dan ang taka kalpui a nih theihna turin bawhzui zel a ni. Dan ang taka inkalpawhna mumal tak a awm theih nan Immigration Check Post reiloteah kalpui ṭan tum a ni," a ti. 

Zokhawthar kal tlanga India leh Myanmar insumdawn tawnna hi hun rei tak chhung kalpui a ni tawh a, dan ang taka kalpui la ni chiah lo mah se chhungkaw tam tak eizawnna a ni tawh. Hei vang hian dan anga kalpui a nih hunah pawh thil kalphung tihdanglam vak loh emaw, tuna an kalpui dana eizawngtute thil inthlak hmachhawn tura lo buatsaih lawk emaw a ṭul hle ang. Ram pahnih inkal pawh tawnna a nih rual hian ramri lehlama chengte hi Zofa tho, kan thisen zawmpui leh kan unaute an nih pawh kan hriat reng a ṭul dawn a; kan sorkar hian a thunun phak loh sipai kutah emaw thil a luh vek chuan harsatna a thleng palh thei tihte pawh hmu lawk thiam se a ṭha khawp mai. 

India ram hmun danga Immigration Check Post ang diak diaka kalpui a nih chuan Zofate tana ṭha tur kan zawnna lamah Zofate tana harsatna thlentu pawh a ni palh thei a, fimkhur leh fing taka thil thlir thiam a ṭul hle dawn a ni. 

Khawvel hmun danga ramri an vil dan ang emaw, khawi emaw laia ramri an veng anga tawngpawng khauh taka kalpui a ṭha ber lo maithei a, thuneitu lam hian uluk taka ngaihtuah lawkin thil an kalpui turah i ngai phawt ang.