Dan hnuaiah ang khat kan ni

Tunlai hian Aizawl khawpuiah Police-te'n hmai tuamna (mask) vuah leh vuah lo ngawrh takin an endik a, kawngpui lûnlai mai ni lo veng hmawr deuhte leh hmun fianrial deuh zawkahte pawh kalin mask vuah lote hi manin pawisa an chawitir ṭhin a ni.

Police-te hian mipui pawisa chawitir hrim hrim hi an tum a ni lo a, Covid-19 laka kan ram a himna turin ṭan an la a ni zawk a, an tiṭha hle. Hri hi a huhoa do ngai chi a ni a, khawilaiah emaw inthlahdah leh inven ṭul ti lote avanga ṭai darh hluai thei a ni a, he hri hlauhawm tak laka kan himna tur hian kan fimkhur tlan a ṭul hle a ni. 

Kawngpui lûnlaiah Police lam hi rim takin an duty ṭhin a, flying squad insiamin anni hian mask vuah leh vuah lo, social distancing kalpui leh kalpui lote thlengin an vai ṭhin. Bazar lunlai deuhah mai an duty tawh lo a, tunah chuan veng kil deuh zawkte thlengin an dap kual tawh a, mipui zawng zawng kan him theihna turin ṭan an la a ni. 

Hetihlai hian TV lam chanchin­tharte kan en chuan kan hotute zawk hi mask vuah mang loa an che vel hmuh tur a awm fo a, social distancing kalpui lem loa an awm khawm tuau tuau pawh a lang fo ṭhin. Mask hi mipui nawlpuiin vuah tura kan duh a nih chuan kan ram hruaitute leh kan sorkar mi pawimawhte pawh hian a theih chin chinah vuah ṭhin se, mipuite pawisa kan chawitir lai meka mask vuah lem loa kan ram hruaitute hmel hmuh tur a awm fo hi a inhmeh lo. 

Dan hnuaiah chuan ang khat vek kan ni a, chumi piah lamah he thil hi chu dan leh dan lo lam aiin kan zavaia himna tura thil pawimawh a ni a, mi lian niha him theihna a nih bik loh avangin Covid-19 hri laka kan him theihna tura inkaihhruaina hi kan zavaiin i zawm ang u.