Health Care Scheme leh Mizoram

Chief Minister chuan sorkar hnathawk leh mipui (sorkar hnathawk lo)-te'n health care scheme inang tlâng an neih theihna turin hma an lak thu tun hnai khan Indian Medical Association, Mizoram State Branch Inkhawmpui ah a sawi.

Chief Minister chuan, sorkarin tlin leh tlin lo chungin mipui tán health care scheme an kalpui mêk thu leh, leiba an neihte pawh a hriat thu te, mipui phun an awm pawh a hriat thu a sawi. He harsatna su kiang tur hian Asian Development Bank aṭangin cheng vaibelchhe 1,000 puk a nih tur thu leh, chu pawisa pung leh Mizoram sum dinhmun ṭha chho tur nen health care scheme ṭha tak kalpui theih a beisei thu a sawi.

Mizoram sorkar siam health care scheme hi a nihna tur ang chuan kalpui se damlote tán thil lawmawm tak, a bikin mirethei leh harsa zawkin an chhawr tur a ni. Hetihlai hian a sorkar berin sum a neih si loh avangin damlo inenkawlna bill hi sorkarin a batsak mek a, leiba tling khawm hi cheng vaibelchhe 70-te a chuang hman hial a ni.

Tunah hian sum dinhmun siam ṭha turin sorkar sum aṭanga tih ngaihna a awm tawh lo a, ADB aṭangin sum ṭhahnem tak puk a ni dâwn. Hei hian hun rei lo te chhung chu sum harsatna hi a chhawk thei dâwn a, nimahsela a puka puk a nih miau avangin rulh leh tur a ni.

ADB loan hi sorkar laipuiin a tam zawk hi min rulhsak dâwn a nih pawhin a bak zawng a rulh lehtu tur chu thawh chhuah sawi tham nei lo state sorkar a ni a, sorkar chuan mipui sum aṭang bawka a rulh a ngai ang.

Health care scheme ṭha tak neih hi duhthusam a ni a, khawvel sorkar lian pawhin harsatna an tawh phahna a ni hial a, Mizoram state-in a kalpui dan pawh hi ennawn deuh chu a ṭha ngawt mai.