Kuhva tawlh ruk lakah Kan tlawm em ni?

Hachhek Bial Kuhva Chingtu Pawl (HBKCP), Hachhek bial chhunga Village Council leh pawl hrang hrang chuan an kuhva thar hralhna kawnga harsatna an tawhte chingfel turin sorkar an kar a, sorkar hnathawk pisa kai tur an dang.

Hachhek bial mipuite harsatna hi a bul chu dan loa kuhva tawlh ruk aṭanga inṭan a ni. Smuggler-te avanga Mizorama kuthnathawktute'n harsatna an tawh chungchangah sorkar hi tun aia chaka a kal a hun hle a ni.

Myanmar aṭanga dan loa kuhva tawlh ruk nghawng chu tunah hian Mizorama kuhva chingtute'n an tuar mek a, dan loa kuhva hralh a tam avangin Assam-in hun rei tak chhung Mizoram aṭanga kuhva lut tur an dang a, smuggler-te thil tih tuartu chu kuthnathawktute an ni ta a ni.

Hetianga buaina a awm lai hian a khat tawkin kuhva tawlh ruk hi man tur a la awm reng a, tun hnaiah Hachhek bial chhungah ngei pawh kuhva tawlh ruk hi mipuiin manin an halsak a ni. Kan sorkar hian kuhva tawlh ruk hi tihtawp tum tak tak ni se thil harsa niin a lang lo a, langsar taka lirtheia phurh ngai a nih avang hian dan theih loh tur a awm lo.

A tawlhtu lam hian lam ṭang an neih avangin man theih lohin an awm nia puh tur khawpin tunah pawh kuhva tawlh ruk hi a la kal reng niin an sawi.

Kan sorkar hian kuhva tawlh ruk hi mit siai tawh loin man tum tak tak se; dan loa thil tih a nih vang pawha tihtawp a ṭhat piah lamah hian kuthnathawktute tana harsatna a thlen tel bawk avangin kuhva tawlh ruk hi tihtawp ngei a ṭha a ni.