Lunglei kawngpui chhia leh DC thu

Aizawl-Thenzawl-Lunglei (ATL) World Bank kawnga Kanghmun leh Lunglei inkar kawngpui chhia thawm ṭhat chungchangah Lunglei DC Kulothungan A chuan kawngpui siamtu Bhavya Constructions aiawhte chu

Bawrhsap chuan Bhavya Construc­tions aiawhte chu an hnathawh a ṭhat tâwk loh thu leh ṭha taka hna thawk zo thuai turin a hrilh.

Lunglei kawng chhia hian chhim lam mipuite a tibuai rei ta hle mai a, a vawi khatna mai ni tawh loin a khat tawkin lirthei tana hlauhawm khawpin a chhe deuh reng a ni ber mai. A siamtu lam hian an siam ṭha tawk lo tih a chiang a, an vil hun chhung a la tawp lo bawk nen, heti ringawta kawngpui an hnutchhiah hi chu a fel lo hle a ni.

Bawrhsapin mipui aiawha na taka a zilhhau ngam hi a lawmawm a, hei hian rah ṭha chhuah ngei se a duhawm. Contractor ngam lo sorkar kan nei fo tawh a, a mawia an han vaukhan ve deuh pawhin contractor lam hian kan hotute hi an hläu lem lo fo a ni. Chutianga zuam­awm ram hruaitu kan nei ṭhin hi a van­duaithlak hle bawk.

Aizawl-Then­zawl-Lunglei kawngpui hi Mizo­rama kawngpui pawimawh ber pakhat a ni a, hei em pawh min siam ṭhat­sak thei lo a nih chuan sorkar tan a tlawm thlak hle ang.

Kan hotute hian he kawngpui hi chonaah ngai se, ṭha taka siam a nih hma loh chu khawng takin ṭang tlat se, mipuite hian kawngpui ṭha neih hi an phu a ni.