MCU-te'n sumdawng an ngenna

Mizoram Consumers' Union (MCU) chuan Krismas leh kumthar vuakvetah sumdawngte chu mipui tana thil man tlawm zawka zuar turin an ngen a; India ramah hunpui (festival) a thlen dawnin dawrkai leh sumdawngte'n mipui nawlpui tan discount an kalpui ṭhin chu Mizoramah pawh kalpui ve se an ti.

Mizorama sumdawngte an sawiselna ber pakhat chu hlep tam an tum lutuk ṭhin a, hei hian mipui nawlpuiah harsatna a thlen, tih a ni. A bik takin thawhnaw zuarte'n sawisel an hlawh fo a, India ram hmun dang aia thawmhnaw man tona nia sawi ṭhin a ni.

He thlirna hi a dik thawkhat a, chik zawka thlir erawh chuan sumdawng lam pawhin ṭan chhan an nei ve ang. Mizorama khawpui liana kawngpui lûn chinah chuan dawr luah man hi a sang hle a, dawr nghaktute hlawh pawh hi hmun dang nen khaikhin chuan a sang niin an sawi. Hei bakah hian mihring (population) an tlem avangin eng thil pawh hi hralh tam a harsa a, a state puma mihring hi state dang khawpui liana veng khata cheng zat lek kan la nih avangin sumdawng tan hlawk tur chuan a man chhiar san a ṭul niin an sawi ve bawk.

Tunah chuan khawvel a inthlak danglam ta a, online-a inzawrhna a tam tawh a, digital marketing hi a takin kalpui a ni ve ta. Discount tamna hmuna mite pawh chah thlen theih a ni tawh a, Mizorama sumdawngte pawhin hetiang hre chung hian an bungraw zawrh hi an chhiar tawhin a rinawm.

Hetiang boruak karah hian, hunpui lo thleng turah mi nawlpui ban phakin kan sumdawngte hian an thil zawrh man hi chhiar thei se a lawmawm ngawt ang.