MPF intichak zel se

Mizoram People Forum (MPF) Governing Board chu tun hnai khan an ṭhukhawm a, MPF Dan Bu ennawn tura rawtnate an thlir ho a; dan bu ennawn turte chu November 22, 2022-a Annual General Meeting-ah pharh a ni ang. MPF leh political party-te thawhhona thuthlung pawh ennawn a ni a, political party hrang hrangte nen sawiho leh tura tih a ni.

MPF hian a din tirh aṭangin Mizoramah inthlanna thiang­hlim leh dik a awm theihna turin ṭan an la a, mipui beisei ang diak diakin thil ti thei lo mah se MPF awm hma leh awm hnua Mizorama inthlanna kalpui dan enin MPF ṭangkaizia a hmuh theih. MPF hi an fel famkim bîk hauh lo a, chuti chung chuan an hnathawh dan thlir hian ram tan an ṭangkai em em a ni.

MPF hian Mizoram pum a tuam chhuak lo deuh a, tun aia zau zawk hian hma la thei se a duhawm hle a ni. Kan inthlan boruak hrang thlirin MPF awmna hmunah chuan a tlangpuiin langsara pawisa leh therhlo sem a tlem deuh zawk a, duhthusam thil thlentir lo mah se MPF hian politics bawlhhlawh zel tur chu thui tak a veng a ni.

Politician-te hian an tlin theihna a nih phawt chuan tih hreh an nei mang lo emaw tih mai tur a ni a, hei vang tak hian MPF mitmei ven tur a lo awm hi a pawimawh hle a ni. MPF an awm chung pawha heti kan nih chuan, an awm loh leh lek phei chuan kan inthlan boruak hi a bawlhhlawh zual palh thei a, chuvangin kan ram hian MPF hi kan la mamawh a, anni lam pawh an intihchak deuh deuh a ṭul takzet a ni.