Sorkar khauh deuh kan mamawh

Tun hnaiah Mizoram hmun hrang hrangah lungawi lohna lantir an tam hle. A ṭhenin kawngpui an dang chat a, ṭhenkhatin sorkar hnathawk pisa kai tur an dang a, lirthei tlan loh ni te pawh an siam a - lungawi lohna an lantir dan pawh a inang lo hlawm.

Heng thil a thlen hian kan sorkar hian ngawi rengin a thlir mai ṭhin ni ber hian a lang. Kan ei leh bar chawk luhna kawngpui an dan pawhin a dangtute hnawh kian tumna a awm lo a, pisa kai tur an dan pawhin ngawi rengin an thlir a ang ber.

Sorkar hian democracy hnuaiah lungawi lohna lantir hi a phal a ni thei a, miin an ngaihdan an puan chhuah khapsak loin an ngaihdan an lantir ve hi a thiangah an ngai a ni thei. Hetihlai hian mipui vantlang tána harsatna thlen thei thilah hi chuan kan sorkar hi khauh deuh ṭhin se a ṭha hle mai.

Sorkar hian mipui pawi sawi a hlauh luatah sorkar angin a che chhuak ngam lo a ang ṭhin. Tun anga lungawi lohna lantirtuten an duh ang anga an awm theihna sorkar neih ringawt hi chu a fel lo; sorkar huaisen leh khauh deuh zawk neih hi kan mamawh a, kan sorkar pawhin tán la thei se a duhawm hle.