Aizawla taxi chuan man

Mizoram Consumers Union (MCU) chuan Aizawla taxi leh two wheeler taxi zingah chuan man (fare) uchuak taka la an awm ṭhin tih an sawi a, chutiang mite chu sim tura an ngen bakah rate to uchuaka chhiarte chu MCU hnena thlen turin an ngen.

Aizawl khawpui hi India ram khawpuia taxi chuan man sanna zingah a tel phak hial mai thei a, hei hi mipui tan phurrit a tling tawh. Hetiang a nih hnua taxi chuan man to zawka lak ching an awm hi a pawi hle mai a, a tihtawp dan zawn a ṭul khawp mai.

Taxi khalh hi chhungkaw tam tak eizawnna a ni a, Aizawl khawpuiah thil man a san em avangin khawpui dangte aia a chuan man tihsan hret pawh hi thil âwm tak a nih theih dan a awm ang a; nimahsela tuna sorkar rate siam aia toa dil ṭhin an awm fo hi a zialo hle a ni.

Taxi khalhtu zingah hawih­hawm leh rinawm tak an awm rual hian duham leh passenger hre lo zawkte laka chuan man sang zawk dil ching an awm a, a pawi hle. Hei mai hi ni loin hnam dang khualzinte hnena chuan man sang zawka lirthei hmantir ṭhinte thlengin an awm a, hengte hi a taxi neitu leh khalhtu pawl lam tan pawh anmahni tihmingchhetute an nih avangin an ngaimawh a hun tawh hle a ni.

Taxi khalh hi Aizawla chhungkaw tam tak eizawnna a ni a, a âwm tawk chuan man an lak hi chu tih tur reng a ni a; nimahsela sorkar permit pek an nih angin sorkarin chuan man a bituk aia sang la an awm ṭhin hi a fel lo a, tihtawp thuai a ngai a, mipuiin kan tih tur hriain hetiang mite hi thuneitute hnenah i thlen ṭhin ang u.