In sak ṭanpuina leh Mizoram

Pradhan Mantri Awas Yojana (PMAY) hmanga mirethei zawkte tana in sakna tur ṭanpuina sum lo kal chu Mizoram sorkarin a tichingpen nasa niin BJP, Mizoram Pradesh chuan press conference-ah an puang. In sak ṭanpuina lo kal hi party induhsakna atan hman a ni a, hei vang hian a nihna tur anga kalpui a nih loh bakah state dangte aiin an sem muang bîk niin an sawi.

Sorkar laipui hian mipuite hmasawnna turin ruahmanna ṭha tak tak a nei a, a hman dan a fel loh erawh chuan mipuite bawkin an tuar ṭhin. State ṭhenkhat chuan a nihna tur ang takin an hmang mai ṭhin a; chutihlaiin Mizoram chauh ni loin state dang ṭhenkhat pawh sorkar laipui project leh scheme kalpui ṭha lo an awm ve bawk ṭhin, a pawi hle.

PMAY hi a bul ṭan dan te, a thil tumte leh an kalpui dante en hian sorkar laipui hian tum ṭha tak neiin mirethei zawkten chenna in an neih ve theihna tur remchang an siamsak a, chutihlaia political party anga thil an kalpui a nih tak tak chuan a fel lo hle ang.

A nihna takah chuan state sorkar hi a ṭanpuina petu tak pawh ni lo, a dawngtu tur thlangtu a ni mah zawk a, miin thilpek a pek sâ a lo tichingpen a nih chuan mipui hmangaih loin party mi leh sâ chauh an hmangaih tihna a ni ang a, a zialo hle a ni.

PMAY a ni emaw, scheme, programme leh project dangah pawh party induh­sakna hi a zavai chuan a bo thei hauh dâwn lo tih a chiang; amaherawhchu induhsakna uchuak a thlen hian mipuiin an tuar ta ṭhin a ni.

Kan sorkar pawhin a awm tawk hria se, mirethei chanhaite hi an party nihnaah teh loin an retheih dan leh mamawhna zawn aṭangin thlir sak hram tawh rawh se.