Sorkar kut zâlah a tla ṭan dawn

Consultative Committee on Health & Family Welfare-te'n nimina Aizawla quarantine facilitiy-te an tlawhnaah an chairman Health minister chuan, state páwn aṭanga Vairengte kaltlanga Mizorama lut turte uluk taka endik a pawimawh thu a sawi a,  "State páwn aṭanga lo lut zingah mahni motor hmanga Vairengte paltlangte fimkhur leh zual zawkin rawn lut se, ei leh in tur pawh mahni intumin, kawng lakah chawlh loh ni se a ṭha. Fimkhur thilah two wheeler chuan rawn luh phal a ni tawh lo," a ti. 

Thla li dawn lai chu Mizo mipui ṭang rualin Covid-19 kan do a, sorkar nen inthu­rualin kil tinah theih­tawp chhuahin kan ṭang tlang a ni. Ṭawng mawi lo ni lo se, task force member ṭhenkhat phei chu sorkar mi leh sa pawh an luh lohna ramri fianrial leh pilrilah an ram mu hial a, khawpuiah ni se task force lamin chhun zan zawmin mahni veng ven him hna an thawk a, mamawhte tan ei tur an chhawp hnaihsak a, an thawkrim tlang hle. 

India ram hmun danga kan hmuh ve loh community quarantine centre-ah pawh khawtlang leh sorkar an ṭang rual zel a, veng leh khaw tam tak chuan sorkar chu kawng engkimah chhawkin quarantine-a khung hrante hmunhma an pek bakah an mamawh tui a thlawnin an pe a, an ei leh inte thlengin an tumsak hial a ni. 

Tunah hian hmun tam takah task force lamin ramri venhim hnate la thawk bawk mah se, a nawlpuia task force duty ang kha chu zawi zawia chawlhsan a ni chho ṭan ta. Sorkar kutah engkim a awm dawn hnai a, mipui tan tlawm­ngaia thawh chhuah reng theih a ni lo. An tha, hun leh sumin a tlin seng tawh bik dawn lo. 

He hun pawimawhah hian Mizoram sorkar hi a ṭan mar pât a ngai a, Zoram mipui nen ṭang ruala hri darh tur a veng hneh anga a ven zui zel a ṭul ang. Kan rama hri vei hmuh chhuahte hi state pawn aṭanga lo lut deuh vek an nih mai bakah an chanchin chiang taka chhui theih a ni deuh vek a, hei hi kan zavaia thawhhona rah chhuah duhawm tak a ni; tunah chuan sorkarin ama tha chakna hmanga hri do hna a thawh chhoh a ṭul ṭan dawn avangin a ṭan hle a ngai ang.

Ṭha taka bul kan ṭan tawh, hun rei tak inkharkhipa kan hlawh chhuah mipui vantlang himna hi sorkarin a chhawm nun chhoh zel a ṭul a, chumi tur chuan Vairengte paltlanga lo lutte pawh tun aia chik zawka an vil a, uluk zawka an ven a ngai ang. Tun hnaiah two wheeler-a an rawn haw thei mai te, truck driver-te puitu ni ang taka inchhala hnam dang an lo lut fo maite pawh hi ven fimkhur a ngai hle a; mipui ban tha chakna hmanga ṭha taka bul ṭan tawh hi sorkarin theihtawp chhuahin han bawhzui zui zel teh se.