Industry neitute

Mizoram Industry Owners Association (MIOA) hruaitute chuan tun hnai khan chief minister an hmu a, Mizorama industry hmasawn dan tur leh Covid-19 vanga industry neitute'n harsatna an tawhte an thlen. 

Mizoramah hian industry hi thil thar ni tawh lo mah se, tun thleng hian industry neih avanga mi hlawhtling sawi tur hi an la tam lo hle. Industry hmanga inti milian kan tih ṭhenkhat pawh an thil siam chhuah an hralhna lam aiin, sorkar laipui aṭanga ṭanpuina subsidy an hmuh chhuah thiam avanga hausa an ni nawk hlawm a, hlawk thama industry-a thil siam chhuak hi an la tam vak lo. 

Hmun dangah industry hi an hlawh­tlinpui viau laiin Mizoramah chuan a hlawhtlinna hmuh tur a la tam lo. Kan state awmna a kilkhawr deuh a, bungraw phurh luh leh thawn chhuah a hautak bik a, state sorkar a la pachhe deuh bawk nen ṭanpuina tur sum leh pai a dah tam thei lo a, state dangte nen khaikhin chuan industry sawi tham a la awm mang lo. 

Sorkarin Zuangtuia industry dintute puala ram a pekte chu mimal ramahte a chang chho nawk tawh a, industrial estate chhungah ngei pawh a taka hnathawk si lo an inphum ṭeuh tawh a ni. Hei mai hi ni loin Luangmual rama Industrial Growth Centre-ah pawh Zuangtui lama a chet sual tawhnaah bawk sorkar hi a che sual nawn palh ang tih hlauhawm khawpin a ram an nêk nasain a chhungah ngei pawh industry neitu ni lo chhungkuaa khawsa an awm leh ta nual mai. 

Tun hma deuh phei kha chuan a tak hmuh tur awm lo industry lem hi tam tak a awm ṭhin a, tun hnaiah pawh hetianga sum awlsam siam tumnaa industry lem din hi an la awm zel a, a vanduaithlak hle. Hetihlai hian a tak taka industry kalpui a, thil siam chhuah (product) nei tak takte an rawn chhuak zel a, a tak leh a lem hi zawi zawiin an inthliar chho ve ṭan niin a lang a, thil lawmawm tak a ni.