Grape wine politics

Excise & Narcotics department chuan November 4, 2022 khan notification tichhuakin grape wine-ah alcohol 10% chin telh a rem ti a, hei aia 2%-a tam emaw chu ngaihhnathiam theih a ni ang.

Mizoram sorkar hian May-ah mai khan Aizawla grape wine zawrh chu a man khawm chiam mai a, cheng nuai 20 man vel zet a man a ni. A man chhan hi chiang taka hriat theih ni lo mah se titi lamah chuan tute emawin kan sorkar hotu lu hnenah man tura an hrilh vang nia sawi a awm a, tak tak ni lo se a duhawm hle a ni.

Grape wine ṭha ti loa man khawm a, a zuartute timang­angtute hian hetih hunlai hian a grape wine siamna lamah chuan an khap miah lo a, a zawrh phal loa Aizawla an man khawmlaiin Champhai district lamah chuan 'zawrh phal loh' chu an siam mup mup thung a, sorkarin engtinmah a ti lo.

September-ah phei chuan Mizoram Liquor Prohibition rules hnuaiah grape wine siam phal a ni ta a, he dan siam hma hian political party zawng zawng remtihna lak a ni a; kan sorkar hotute chuan grape chingtute chu tlawhin a hlawhtlinna tura hmalakpui zel an tum thute an hrilh leh lawi si a ni.

Sorkarna vawn fung chelhtute hian grape wine hi ṭha an ti nge an ti lo tih pawh a hriat loh a, political party dangin an rem tih chuan a zawrh ṭha an tih piah lamah a hralhna thlenga dappui an tum lawi si a, chu grape wine tho chu May thla maia an man kha a ni!

Grape wine kan kalpui dan hi a chingtute dinchhuahna lam aiin a politics mit aṭangin kan thlirin politics-ah kan kai lut a ang ṭhin.